گاڤ

وەزارەتا دارایى و ئابۆری یا حکومەتا هەرێما کوردستانێ بەرسڤا دەنگۆیێن ل دۆر مووچەیێ مەها ئێک دا و راگەهاند؛ بەغدا 36 ملیار دینار ژ تەمویلا مووچەیێ خانەنشینان بڕینە و ئەڤرۆ ب نڤیسارەکا فەرمی داخوازا خەرجکرنا وێ پارەیی ژ بەغدا هاتییە کرن.

پێنجشەمبییێ 12ێ شوباتا 2026ێ، وەزارەتا دارایى و ئابۆری یا حکومەتا هەرێما کوردستانێ رۆهنکرنەک ل دۆر کێموکاسییێن مووچەیێ مەها کانوونا دویێ (مەها 1) بەلاڤکر.

وەزارەتا دارایى د بەیانەکێ دا ئاشکرا کر: "وەزارەتا دارایى یا ئیراقێ پتر ژ 36 ملیار دیناران ژ تەمویلا مووچەیێ مەها ئێک بڕینە و نەهنارتینە، ئەو پارە ژی مووچەیێ چەند مەهێن خانەنشینێن سەربازی و شارستانی و کێمئەندامێن سەنگەری بوون".

ل گۆرەی بەیانێ، وەزارەتا دارایى یا هەرێمێ ل 27ێ مەها بۆری ب نڤیسارا ژمارە 366 داخوازا نێزیکی 281 ملیار دیناران بۆ خانەنشینان کربوو، لێ بەغدا تنێ نێزیکی 244 ملیار دینار وەک تەمویلا مووچەیێ خانەنشینان هنارتینە.

وەزارەتا دارایى گۆت ژی: "ئەڤرۆ مە نڤیسارا دویێ ئاراستەیی وەزارەتا دارایى یا ئیراقێ کرییە و تێدا داخوازا خەرجکرنا وێ 36 ملیار دینارێ کێمکری کرییە وەک تەمامکەرا تەمویلێ مووچەیی و شایستەیێن خانەنشینان".

ل دۆر تۆمەتبارکرنا وەزارەتێ ب کێموکاسییان، وەزارەتا دارایى هوشداری دا کو "هەر کێموکاسییەک یان لێبڕینەک د مووچەیی دا هەبیت، وەزارەتا دارایى یا ئیراقێ ژێ بەرپرسیارە، چونکی هەیاما سێ سالانە مووچە ل بەغدا خەرج د بیت" و دیا کر کو ئەو دێ سکالایا یاسایی ل دژی وان کەسان و سازییان تۆمارکەن یێن تۆمەتێن نەڕەوا ئاراستەیی وەزارەتێ دکەن.