گاڤ

ئاژانسا نووچەیان یا رویتەرز ئاشکرا کریە، رۆژا سێشەمبییا بهێت، باژێرێ جنێڤ دێ مێهڤاندارییا گەرا دویێ یا دانوستانێن دناڤبەرا شاندێن ئەمریکا و ئیرانێ دا کەت.

رویتەرز ل سەر زارێ ژێدەرەکی راگەهاند ژی، سپێدەهییا رۆژا سێشەمبیێ شاندەکێ ئەمریکی کو ژ ستیڤ ویتکۆف و جارێد کوشنەری پێکدهێت، دێ ل گەل بەرپرسێن ئیرانێ کۆم بن.

وی ژێدەری ئاماژە ب وێ یەکێ ژی کریە، کو نوینەرێن عومانێ دێ بەرهەڤبن بۆ ساناهیکرنا پەیوەندی و ناڤبەینکارییێ دناڤبەرا هەردو ئالییان دا.

ژ ئالییەکێ دی ڤە، مالپەرێ ئاکسیۆس یێ ئەمریکی ئەڤرۆ بەلاڤکر، کو ئەمریکا چەندین پەیام ل دۆر دانوستانێن ئەتۆمی، ب رێیا عومانێ بۆ ئیرانێ هنارتینە.

مالپەری ل سەر زارێ بەرپرسەکێ ئەمریکی بەلاڤکریە، کو ستیڤ ویتکۆف، هنارتییێ تایبەت، ل گەل وەزیرێ دەرڤە یێ عومانێ ئاخڤتییە و چەندین پەیام ل دۆر دانوستانێن ئەتۆمی داینێ، دا کو بگەهینیتە ئیرانییان.

وی بەرپرسی ئاماژە ب وێ یەکێ دا، کو وەزیرێ دەرڤە یێ عومانێ پەیامێن ویتکۆفی رادەستی عەلی لاریجانی، سکرتێرێ جڤاتا بلند یا ئاسایشا نەتەوەیی یا ئیرانێ کرینە، کو رۆژا سێشەمبییا بۆری سەرەدانا باژێرێ مەسقەت کربوو.