گاڤ

ئاژانسا رویتەرز بەلاڤکرییە؛ ئەمریكا داخواز ژ ئەحمەد شەرع، سەرۆکێ سووریێ بۆ قویناغا ڤەگوهاستنێ کریە کو د سەرەدەریکرنێ دا ل گەل داخوازییێن هێزێن سووریایا دیمۆکرات (هەسەدە) نەرمییەکا باش نیشان بدەت.

ل گۆرەی زانیارییێن ئاژانسا رویتەرز کو ژ زارێ بەرپرسەکێ رۆژئاڤایی ڤەگوهاستینە؛ واشنتۆن دخوازیت کورد د ناڤ دەولەتا سووریێ دا جۆرەکێ ئۆتۆنۆمیێ هەبیت، ب مەرجەکی ئەو ئێک نەبیتە گەف بۆ سەر دەستهەلاتا ناڤەندی یا دیمەشقێ.

ئەو بەرپرسێ رۆژئاڤا ئاماژە ب وێ یەکێ ژی دایە؛ واشنتۆن یا رازی یە ل سەر وان پێشکەفتنێن د پرۆسەیا ئێکگرتننێ دا یا ل گۆرەیی رێککەفتنا 29ێ کانوونا ئێکێ هاتییە کرن، لێ هێشتا کێشەیێن سەرەکی یێن وەک تێکهەلکرنا شەرڤانێن هەسەدێ د ناڤ سازییێن سەربازی دا، چارەنڤیسێ چەکێن گران و دەرگەهێ سنۆری ل گەل ئیراقێ کو ب شاهدەمارا ئابۆری یا هەسەدێ دهێتە دانان، نەهاتینە ئێکلاکرن.

ئەڤە د دەمەکی دا یە، دوهی ل کۆنفرانسێ ئاسایشا میۆنشن کۆمبوونەک دناڤبەرا ئەسعەد شەیبانی وەزیرێ دەرڤە یێ سووریێ و مەزلووم عەبدی فەرماندەیێ گشتی یێ هێزێن هەسەدێ و ئیلهام ئەحمەد هەڤسەرۆکا پەیوەندییێن دەرڤە یا رێڤەبەرییا خۆسەر ل گەل مارکۆ رۆبیۆ وەزیرێ دەرڤە یێ ئەمریکا هاتە برێڤەبرن.