گاڤ

نێرینگەها ئابۆری ئاشکرا دکەت؛ خەرجییێن مەهانە یێن حکومەتا ئیراقێ د کەرتێ کارەبێ دا 600 ملیار دینار دەرباز کرینە، لێ داهاتێ وێ ناگەهیتە ئێک ملیار دیناران.

نێرینگەها "ئیکۆ ئیراق" د راپۆرتەکێ دا بەلاڤکرییە؛ ئەو پارەیێ مەهانە ل کەرتێ کارەبێ دهێتە خەرجکرن کو پترە ژ 600 ملیار دیناران، بۆ مووچەیێن فەرمانبەران، چاککرنا وێستگەهـ و ئامیرەیان و کڕینا سوتەمەنییێ دچیت.

ل گۆرەیی داتایێن وێ نێرینگەهێ، سەرباری وێ خەرجییا مەزن، حکومەتێ نەشیایە کارەبێ وەک پێدڤی دابین بکەت، چونکی مەهانە تنێ 28 هزار مێگاواتێن کارەبێ بەرهەم دئینیت، د دەمەکی دا پێدڤییا وەلاتییان 50 هزار مێگاواتن.

ل دۆر داهاتی ژی هاتییە دیارکرن؛ حکومەتا فیدرال د کۆمکرنا کرێیا کارەبێ دا یا سەرکەفتی نەبوویە و مەهانە تنێ 0.17% ژ داهاتی بۆ گەنجینەیا دەولەتێ دزڤریت کو دبیتە نێزیکی ئێک ملیار دیناران.

ئیکۆ ئیراق هوشدارییێ ددەت کو ئەڤ کەلێنا مەزن دناڤبەرا خەرجی و داهاتی دا بوویە ئەگەرێ زێدەبوونا کورتهێنانێ د بودجەیێ دا و بڕیارێن وێرانە و چاکسازییێن بنەرەتی دڤێن، چونکی دۆسیەیا کارەبێ ژ قەیرانەکا خزمەتگۆزاری هاتییە گوهۆرین بۆ ئالنگارییەکا دارایی و ئابۆری.