گاڤ

ئەسعەد حەسەن شەیبانی، وەزیرێ دەرڤە یێ سووریێ، مەزلووم عەبدی، فەرماندەیێ گشتی یێ هەسەدێ و ئیلهام ئەحمەد، بەرپرسا پەیوەندییێن دەرڤە یا رێڤەبەرییا خۆسەر، ل گەل شاندەکێ کۆنگرێسێ ئەمریکا کۆمبوون.

ئەڤرۆ شەمبییێ 14ێ شوباتا 2026ێ، ل پەراوێزا کۆنفرانسێ ئاسایشا میۆنشن، شاندەکێ سووریێ کو پێکهاتبوو ژ ئەسعەد حەسەن شەیبانی، وەزیرێ دەرڤە یێ وی وەلاتی مەزلووم عەبدی، فەرماندەیێ گشتی یێ هێزێن سووریایا دیمۆکرات (هەسەدە) و ئیلهام ئەحمەد، بەرپرسا پەیوەندییێن دەرڤە یا رێڤەبەرییا خۆسەر، ل گەل شاندەکێ کۆنگرێسێ ئەمریکا ب سەرۆکاتییا سیناتۆر جین شاهین کۆمبوون.

ل گۆرەیی سەرۆکاتییا سووریێ، د کۆمبوونێ دا، دویماهی پێشهاتێن سووریێ و دەڤەرێ و گرنگییا پاراستنا ئێکرێزی، سەروەری و ئێکپارچەیییا ئاخا سووریێ هاتنە گۆتوبێژکرن.

سەرۆکاتییا سووریێ دبێژیت: هەردو ئالییان دوپاتی ل سەر پشتەڤانیکرنا پرۆسەیا سیاسی بۆ گەهشتن ب ئاسایش و سەقامگیرییێ کر.