گاڤ

ل پەراوێزا رۆژا ئێکێ یا کۆنفرانسێ ئاسایشا میۆنشن، ئیمانوێل ماکرۆن، سەرۆکێ فرەنسا د دیدارەکا دۆستانە و گەرم دا ل گەل مەزلووم عەبدی، فەرماندەیێ گشتی یێ هێزێن سووریایا دیموکرات (هەسەدە)، پشتەڤانییا بێمەرج یا وەلاتێ خۆ بۆ هێزێن کوردی دوپاتکر و ب "شەرڤانێن ئازادییێ" وەسف کرن.

ماکرۆن د دانوستاندنەکێ دا کو ڤیدیۆیا وێ بەلاڤ بوویە، بەرێ خۆ ددەتە مەزلووم عەبدی و دبێژیت: "تۆ دشێی پشتا خۆ بمن گەرم بکەیی، تۆ ب خۆ دزانی." سەرۆکێ فرەنسا ئاماژە ب وێ چەندێ کر، ئاگەهدارێ هویرکاتییێن وان گفتوگۆیێن ب زەحمەتە یێن کو دناڤبەرا هەسەدە و ئەحمەد شەرع، سەرۆکێ دەمکی یێ سووریێ دا هاتینە برێڤەبرن، هەروەسا تەکەز ل وێ چەندێ ژی کر، مەزلووم عەبدی د وان سازشێن کرین دا، یێ ل سەر حەقییێ بوو.

سەرۆکێ فرەنسا دیدگەها وەلاتێ خۆ بۆ پاشەرۆژا سووریێ رۆهن کر و راگەهاند؛ پاریس بەرەڤانییێ ژ ئێکپارچەیییا ئاخا سووریێ و ئێکگرتنا وێ دکەت، لێ گۆت: "بەرەڤانییێ ژ وێ چەندێ ژی دکەم کو دڤێت رێز ل هێزێن سووریایا دیمۆکرات، ب تایبەتی کوردان بهێتە گرتن و پشکدارییەکا کارا پێ بهێتە کرن".

د پشکەکا دی یا ئاخفتنێن خۆ دا، ماکرۆنی ئاماژە ب وی "قەری" کر کو ژ ئەگەرێ شەڕێ دژی داعشێ ل سەر ملێن جڤاکێ ناڤدەولەتییە و گۆت: "ئەز وی قەرزی ژ بیرناکەم یێ کو ل سەر ملێن مە یە بەرامبەری هەوە." هەروەسان سۆز دا، د رۆژێن بهێت دا جارەکا دی ل گەل شەرعی بئاخڤیت دا کو پشتراست ببیت کو هەمی ئالی پابەندی رێککەفتنان دبن.

مەزلووم عەبدی سوپاسییا هەلویستێن ماکرۆنی کر و هیڤی خواست ئەو گاڤێن بەحس لێ هاتینە کرن بهێنە هاڤێتن و رێککەفتن وەک خۆ بهێتە بجهئینان. ماکرۆنی ژی د دویماهییێ دا تەکەز کر کو فرەنسا ب هویربینی چاڤدێرییا رەوشێ دکەت و گۆت: "ئەڤە هوین بوون ئەو سەرکەفتنە بدەستڤەئیناین."