گاڤ

ل دەمەکی کو پاقژی پشکەکا گرنگ یا ساخلەمییێ یە، گەلەک وەلاتی رۆژانە جارەکێ یان پتر خۆ دشوون، لێ پسپۆرێن ساخلەمییا پیستی هوشدارییێ ددەن کو ئەڤ عەدەتە پتر دبیتە ئەگەرێ زیانان نەک مفایی.

ل گۆرەی شارەزایان، خۆ شویشتنا رۆژانە دبیتە ئەگەرێ ژناڤچوونا وێ چوینا چەور یێ پارێزەر و بەکتریایێن ب مفا یێن کو ب رەنگەکێ سروشتی ل سەر پیستی هەیی. ئەڤ چەندە دشێت ببیتە ئەگەرێ هشکبوون، خوریانا پیستی و زیانگەهاندن ب بەرگرییا سروشتی یا وی. هشکبوونا پیستی ژی رێکێ خۆش دکەت بۆ تووشبوون ب هەوکردن (ئیلتیهابات) و هەستیارییێ (حەساسیەتێ)، هەروەسان وەدکەت بەکتریایێن زیانبەخش ب ساناهی بچنە دناڤ تیخێن پیستی دا.

ژبلی زیانێن وێ بۆ پیستی، خۆ شویشتنا زێدە و بەردەوام کارتێکرنەکا نەرێنی ل سەر سیستەمێ بەرگرییا لەشی ژی هەیە. سیستەمێ بەرگرییێ پێدڤی ب وێ چەندێ هەیە کو بەرکەفتن ل گەل میکرۆبان هەبیت دا بشێت بەرگرییەکا بهێز ل دژی وان دروست بکەت. دەمێ رۆژانە خۆ دشوین، ئەڤ بەرکەفتنە کێم دبیت و د ئەنجام دا سیستەمێ بەرگرییا لەشی لاواز دبیت.

د هەمان دەم دا، ئەو کەسێن رۆژانە خۆ دشوون، پتر بەرکەفتنا وان ل گەل وان ماددەیێن کیمیایی دبیت یێن دناڤ ئاڤێ دا هەنە وەک خوێ، کلۆر، فلۆراید و ماددێن قڕکەر، ژبلی وان ماددەیێن کیمیایی یێن دناڤ بەرهەمێن پاقژکەرێن پرچێ دا هەیی.

پسپۆر دبێژن؛ وەک چاوا خۆ شویشتنا رۆژانە مفایێن ساخلەمییێ نینن، دبیت زیان ژی هەبن، هەروەسان ئاڤەکا زێدەتر ژی ب هەروە دچیت و د ئەنجام دا زیان دگەهیتە ژینگەهێ ژی.