گاڤ

ل سەر راسپاردەیا مەسروور بارزانی، کێشەیا قوتابییێن خواندنا ئیسلامی هاتە چارەکرن و 165 قوتابی ل زانکۆییان هاتنە وەرگرتن.

دوشەمبییێ 16ێ شوباتێ 2026ێ، وەزارەتا ئەوقاف و کاروبارێن ئایینی راگەهاند؛ ل سەر راسپاردەیا مەسروور بارزانی، سەرۆکێ حکومەتا هەرێما کوردستانێ، پشتی کۆمبوونا هەڤپشک دناڤبەرا ئالییێن پەیوەندیدار دا ل 25ێ کانوونا دویێ، بریارا چارەکرنا کێشەیا وەرگرتنا قوتابییێن قوتابخانەیێن خواندنا ئیسلامی ل زانکۆیان هاتە دان.

ل گۆرەیی بڕیارا ژمارە 3211 یا وەزارەتا خواندنا بلند، ئەڤرۆ ب فەرمی 165 قوتابییێن قوتابخانەیێن ئیسلامی یێن سەر ب وەزارەتا ئەوقافێ ڤە ل زانکۆیێن کوردستانێ هاتنە وەرگرتن و وەزارەتا ئەوقافێ ژی سوپاسییا سەرۆکێ حکومەتێ کر.

ژئالییێ خۆڤە عەبدوللا شێرکاوەیی، پەیڤدارێ ئێکەتییا زانایێن ئایینێ ئیسلامی بۆ میدیایان دیارکر؛ پشتی بزاڤەکێن مەزن رەزامەندی ل سەر وەرگرتنا دەرچوویێن پۆلا 12ێ یا قوتابخانەیێن ئایینی ل زانکۆ و پەیمانگەهان هاتییە دان.

شێرکاوەیی ئاماژە ب وێ چەندێ ژی دا، دەستهەلات ب زانکۆیان هاتییە دان بریارێ بدەن کا ئەو قوتابی دەست ب دەوامی بکەن یان ژی بۆ سالا داهاتی بهێنە پاشخستن.

ل هەرێما کوردستانێ 20 قوتابخانە و 2 پەیمانگەهێن ئایینی یێن تایبەت هەنە کو سەر ب وەزارەتا ئەوقافێ و کاروباریێن ئایینی ڤەنە.