گاڤ

لیژنەیا دیسپلینێ یا ئێکەتییا تەپاپێ یا ئیراقێ کۆمەکا سزایێن توند ل دژی یانا زاخۆ دەرکرن؛ ژ بلی غرامەیا 25 ملیۆن دیناری، ژمارەیەکا بەرپرس و کارگێرێن یانەيێ ژی هاتنە سزادان.

دوشەمبییێ 16ێ شوباتێ 2026ێ، ئێکەتییا تەپایێ یا ئیراقێ د بەیانەکێ دا راگەهاند، پشتی کۆمبوونا لیژنەیا دیسپلینێ و گۆتوبێژکرنا راپۆرتا چاڤدێرێ یارییا زاخۆ و دهۆکێ، کو ل 23ـی کانوونا دویێ یا 2026ێ ل یاریگەها فرەنسۆ حەریری هاتبوو برێڤەبرن ب وەکهەڤی (1-1) ب دویماهی هاتبوو، لیژنەیێ چەندین بریار ل دژی یانەیا زاخۆ دەرکرن.

د بەیانێ دا هاتییە، ل گۆرەیی راپۆرتا چاڤدێرێ یارییێ، یانەیا زاخۆ بەرپرس بوویە ژ کێشەیێن دەرگەهێ مەقسوورەیا سەرەکی و ب رێیا هەماهەنگکارێ راگەهاندنێ و کارگێرێن یانەیێ، پتری 200 کەسان ژ ئالییێ وان ڤە چووینە ژوور، ئەڤە د دەمەکی دا بوو، یاری بێ جەماوەر بوو.

ئێکەتییا تەپایێ یا ئیراقێ دبێژیت: "هەروەسان د راپۆرتێ دا هاتییە؛ پشتی گۆلا وەکهەڤییێ یا یانەیا دهۆکێ، شەر و ئاخڤتنێن نەشرین دناڤبەرا ئالییان دا دروست بووینە و هێرش کرییە سەر سەرۆکێ یانەیا دهۆکێ و پۆلیس و کارگێرێن دهۆکێ بریندار بووینە، سەرباری وێ یەکێ کو کورسی و جامێن vip ژ ئالییێ جەماوەرێ زاخۆ ڤە هاتینە شکاندن."

لیژنەیا دیسپلینێ ئەڤ بریارە ل دژی یانا زاخۆ دەرکرن:

1-  سزایێ دارایی: غرامەکرنا یانەیا زاخۆ ب کۆژمێ 25,000,000 (بیست و پێنج ملیۆن) دینارێن ئیراقی.

2-  ڕاگرتنا کارگێران: هەر ئێک ژ (سەردار محەمەد، نەشوان سالح، کەرەم هەوار و بلند نەجیب) هەتا دویماهییا قویناغا ئێکێ ژ خۆلا ستێرێن ئیراقێ ژ یاوەرییا تیمێ هاتنە بێبەهرکرن.

3-  سزادانا پشتەڤانان: سەرۆکێ کۆمەلەیا پشتەڤانێن زاخۆ (هومان گولی) و هاریکارێ وی (ئەحمەد گولی) هەتا دویماهییا قویناغا ئێکێ بۆ وان نینە بچنە د چو یاریگەهان دا و ژ یاوەرییا تیمێ هاتنە بێبەهرکرن.

4-  پشکا راگەهاندنێ: عەلی حاجی، هەماهەنگکارێ راگەهاندنا یانەیا زاخۆ بۆ هەیاما 3 یارییان ژ یاوەرییا تیمێ هاتە ڕاگرتن.

ئێکەتی هەروەسان دیاردکەت، لیژنەیا دیسپلینی ئاشکرا کرییە، بریار ب کۆدەنگی هاتییە دان و مافێ تانەلێدانێ هەیە.