گاڤ

لیژنەیا ئابۆری ل بەردەرەش دەست دانا سەر 1000 لیترێن شەربەتا تێکچوویی و بێی دیرۆکا بسەرڤەچوونێ.

چارشەمبییێ 18ـێ شوباتێ 2026ێ، قایمقامییا قەزا بەردەرەش د بەیانەکێ دا راگەهاند، د بەردەوامییا دویڤچوونێن لیژنەیێن قایمقامییێ دا، لیژنەیا ئابۆری یا قایمقامیییا قەزایێ، هەر د رۆژا ئێکێ یا مەها پیرۆزا رەمەزانێ دا، دەست دانا سەر 1000 لیترێن شەربەتێ.

ل گۆرەیی بەیانا قایمقامییا قەزا بەردەرەش، ئەو کۆژمێ شەربەتێ بەروار ل سەر نەبوو و تێکچووبوو، هەروەسان ب رەنگەکێ نەتەندروست و دویر ژ مەرجێن ساخلەمییێ هاتبوو ڤەگوهاستن.

هەروەسان دیار کرییە، خودانێ وێ شەربەتێ خەلکێ پارێزگەها دهۆکێ بوو و مەرەم پێ ئەوبوو ل قەزا بەردەرەش بفرۆشیت، لێ ژ ئالییێ لیژنەیێ ڤە د ناڤ ترومبێلێ دا دەست ب سەر دا هاتە گرتن.

هەژی گۆتنێ یە، ل مەها رەمەزانێ خواستەکا زێدە ل سەر خوارن و ڤەخوارنێ زێدە دبیت و ب تایبەتی جۆرێن شەربەتێ، لەوما رێڤەبەرییا گشتی یا ساخلەمییا پارێزگەها دهۆکێ وەک هەر سال و ل 15ێ ڤێ مەهێ رێنماییێن تایبەت ب مەها رەمەزانا ئەڤ سالە بەلاڤکرن و هوشدارییێ ددەتە دوکانداران کو هەر کەسێ سەرپێچییێ بکەت، دێ هێتە سزادان.

ل دۆر فرۆتن و دروستکرنا شەربەتێ دیارکربوو:

● پێدڤییە ل هەمی جهێن چێکرنا شەربەت و تەزیاتییان ئامیرەیێن ڤاڤارتن و تافیلکرنا ئاڤێ بهێنه‌ دانان و بەردەوام ئەڤ ئامیرە کاربکەن.

● پێدڤییە شەربەت بۆ رۆژەکێ بتنێ بهێتە دروستکرن و دناڤ تەزیکەران دا بهێتە هەلگرتن.

● نابیت شەربەت ل سەر عەرەبانەیان و ل سەر شووستەیان بهێته‌ فرۆتن.

● فێقی باش بهێته‌ شویشتن و زوهاكرن و پاشی بۆ شه‌ربه‌تێ بهێته‌ بكارئینان.

● دێ رێ شەربەتا مێویژان بۆ بەرهەڤکرن و فرۆتنێ ل جهێن دەستویردایی هێتەدان.

● دروستە ل مارکێتان شەربەت بهێتە فرۆتن ب مەرجەکی ل جهەکێ دەستویردایی بهێتە دروستکرن و مێژوو و جهێ لێ  دروستکری ل سەر بیت.