گاڤ

شارەزایێن ساخلەمییێ بەحسا مفایێن وەرزشکرنێ د مەها رەمەزانێ دا دکەن و دبێژن، ل گەل وێ یەکێ کو پترییا موسلمانان د ڤێ مەهێ دا ماندی دبن و ب زەحمەت وەرزشێ دکەن، لێ کرنا وەرزشێ دشێت ساخلەمییا وان باشتر بکەت و رۆژیگرتنێ ل سەر وان ساناهیتر بکەت.

وەرزشکرن د رەمەزانێ دا ئەڤ مفایە هەیە

بەلگەیێن زانستی یێن گرنگ و بهێز هەنە کو سەلماندینە وەرزشکرن د رەمەزانێ دا مفایێن مەزن بۆ ساخلەمییێ هەنە، کو ئەڤێن خوارێ نە:

ساخلەمییا دلی: وەرزشکرن د ڤێ مەهێ دا فشارا خوینێ ب ساخلەمی دهێلیت، وەدکەت ئنسولین باشتر کار بکەت و د هەمان دەم دا رێگرییێ ل قەلەوبوونێ دکەت.

شەکرا خوینێ جهگیر دکەت: رۆژیگرتن شێوازێ بکارئینانا شەکرێ ژ ئالییێ لەشی ڤە دگوهۆریت، لەوما وەرزشەکا کێم-ناڤنجی هاریکارییا هەرسکرنا دوهنی و باشترکرنا شێوازێ بکارئینانا ئنسولینێ دکەت.

مفایێ دەروونی ژی هەیە: وەرزشکرن هورمونێ سترێسێ کێم دکەت، مۆد و جەوی باشتر دکەت و خەوێ ژی باشتر لێ دکەت.

پاراستنا ماسولکەیان: دەمێ کەسەک ب رۆژی دبیت، ب تایبەتی ئەگەر رێژەیەکا باش یا پرۆتینێ وەرنەگریت، ئەگەر هەیە ماسولکەیان ژ دەست بدەت. وەرزشکرن د ڤی دەمی دا هاریکارییا پاراستنا ماسولکەیان دکەت و کێشا لەشی رێک دئێخیت.

کیژ دەم بۆ وەرزشکرنێ گونجاییترینە؟

د هەیڤا رەمەزانێ دا چەند دەمێن گونجایی بۆ وەرزشکرنێ هەنە، وەکی:

1-2 دەمژمێر پشتی فتارێ: پشتی شکاندنا رۆژیسێ، لەش تێرئاڤ دبیت و وزەیەکا باش وەردگریت، لەوما پشتی دەمژمێرەکێ بۆ دو دەمژمێران وەرزشەکا ناڤنجی یان کاردیۆ دشیان دا یە بهێتە کرن و ب ڤی رەنگی مەترسییا هشکبوونێ کێمتر دبیت. پسپۆر دبێژن ئەڤ دەمە ئارامترین و کاریگەرترین دەمە بۆ وەرزشکرنێ.

بەری فتارێ: وەرزشکرنێن سادە و ناڤنجی وەکی ب پییان چوون، پایسکلسواری و سترێچکرن کاریگەرن. د ڤی دەمی دا دوهن پتر دهێتە سۆتن و ب تایبەتی بۆ وان کەسان باشە یێن دخوازن کێشا لەشێ خۆ کێم بکەن. لێ دڤێت د ڤی دەمی دا وەرزشێن گران نەهێنە کرن و خۆ گەلەک نەوەستینن.

چەند تێبینییێن گرنگ:

● رۆژانە بۆ هەیاما 30-45 خۆلەکان وەرزشێ بکە.

● پشتی فتارێ هەتا بانگێ سپێدێ رێژەیەکا باش یا ئاڤێ ڤەخۆ.

● بلا د ڤێ مەهێ دا ئارمانجا تە ژ وەرزشێ تنێ پاراستنا ساخلەمی و کێشا تە بیت، نەکو دروستکرنا ماسولکەیان.

● خوارنێن تە پێدڤیە پێکبهێن ژ پرۆتین، کاربۆهیدراتێن ئالۆز، شلەمەنی و ریشالان.

● هەردەم گوهێ خۆ بدە لەشێ خۆ و دەما تە هەست ب هشکبوون، سەرگێژی و نەخۆشییێ کر، ژ وەرزشکرنێ راوەستە.