دلۆڤان حەسەن

ل بن سیبەرا چیایێن سەرکێشێن ئامێدیێ، ل گوندێ پیرۆزانا، ژیان ب سادەیی دزڤڕی. وەک مامۆستایەک، من دزانی کو ل پشت دیوارێن قوتابخانێ تشتەک دێ هێتە گوهۆڕین، لێ من نەدزانی کو ئەو دەنگە دەنگا ل وی خانیکێ کەڤن، دێ دەنگێ خوە گەهینتە دلێ ئەوروپا.

رۆژەکێ، دەنگێ شاد یێ نەورۆزی ل پشت قوتابخانێ بلند بوو، هەر وەک کانییەکا تژی ئومێد دیتبیت، ب کەیف ڤە گازی هەڤالێن خۆ دکر: "وەرن، ئەوا مە دڤیا ئەڤە ل ڤێرە من دیت!"

ئەو ل دویڤ هندەک رەحلێن داری دگەڕیان؛ ئەو تەختێن کو سالان تۆزێ نخاڤتین و بێسەروبەر د کاڤلێ ل پشت قوتابخانێ کەفتین. من ب دلەکێ ب گومان دگۆتێ: "ئەڤە یێن قوتابخانێنە، مە نەهاڤێتینە لێ ژ کارکەفتینە و سەردەمێ وان نەمایە." لێ وان ب چاڤەکێ دی بەرێ خۆ ددایێ. وان نە رەحلێن شکەستی، بەلکو وان دیرۆک و جوانی دناڤ دارێن وێ دا ددیت.

نەورۆزی گۆت:مە کار ب ڤان رەحلان هەیە و ئەم گەلەک لێگەریاینە.

د دەمەکێ کێم دا، خانیکەکێ سادە کرە پەرستگەهەکا هونەری. وان گەنجێن دەستڕەنگین، ئەو جهێ بێدەنگ کرە قوتابخانەکا کلاسیک یا پڕی هەست. پشتی د چەند رۆژەکان دا کارێ خۆ تەمام کری، دەمێ ئەز چوویمە ژوور، من هەست ب غەریباتییەکا جوان کر؛ ئەو دیزاین و رێکوپێکیا وان کری، ئەز برمە ناڤ جیهانا زارۆکینیێ. ژبەرکوو ژوورەکا بچویک وەکی قوتابخانەکا کەڤنارا خۆدان دیرۆکەکاک مەزن لێکربوو،من د دلێ خوە دا گۆت: "

چەند د مەزن و رەنگینن ئەو دەستێن د ژوورەکا هوسا تەنگ دا، جیهانەکا بەرفرەهـ دئافرینن."

ئەو کارێ ب پاقژی و دلسۆزی هاتییە ئەنجامدان، ئەڤرۆ ل ئاسمانێ بەرلینێ د برسقیت. کورتە فلمێ (سپی)ب دەرهێنانا کوڕێ دەڤەرا مە، نەورۆز شەعبان, شیا ل فەستیڤالا "بەرلینالێ" خەلاتێ لژنەیا دادوەران بۆ باشترین کورتە فلم ب دەستڤە بینیت.

 دیسان نەورۆزی و هەڤالێن خۆ سەلماند کو شیانێن گەنجێن مە چ سنووران نانیاسن. ب هندەک کەرەستێن کێم و سنۆردار، لێ ب هزرەکا دەولەمەند و خەمخۆرانە، شیان ناڤێ کوردستانێ هێشتا بلند بکەن.

و ئەگەر پشتەڤانی بۆ گەنجێ کورد هەبیت ما گەنجێ کورد ژ کێ کیمترە!

پیرۆزە ل کاک نەرۆز و هەڤالێن وی و هەر کوردەکی