گاڤ

بەنکا بازرگانی یا ئیراقێ (TBI) بڕیارەکا نوی ل دۆر وان پارەیان دەرئێخست یێن کو تێکچووین یان زیان گەهشتییێ و رادگەهینیت، ژ نوکە و وێڤە وەلاتی دشێن ل هەمی تایێن وان، وان پارەیان ل گەل پارەیێن نوی بگوهۆرن.

دوشەمبییێ 23ێ شوباتا 2026ێ، بەنکا بازرگانی یا ئیراقێ (TBI) د راگەهاندنەکێ دا بەلاڤکر: "ب پشتبەستن ل سەر رێنماییێن بەنکا ناڤەندی یا ئیراقێ، خزمەتگۆزارییا گوهۆرینا وان پارەیێن کو زیان گەهشتییێ و تێکچووین، ل هەمی تایێن مە یا بەردەستە".

مەرجێن گوهۆرینا پارەیێن تێکچوویی

ل دویڤ بەنکا بازرگانی یا ئیراقێ، پرۆسەیا گوهۆرینێ دێ ل گۆرەیی یاسایا ژمارە 56 یا سالا 2004 یا بەنکا ناڤەندی بیت و تێدا جۆر و مەرجێن وان پارەیان هاتینە دیارکرن یێن کو دێ هێنە گوهۆرین:

ئەو پارەیێن ژ بەر بکارئینانا مەزن کەڤن بووین، لێ چو پشک ژێ بەرزە نەبووینە.

ئەو پارەیێ دڕیانەک تێدا بیت و درێژاهییا وێ ژ (٣ سانتیمەتران) زێدەتر نەبیت و ب شەریتەکا شەفاف (لسقە) هاتبیتە چێکرن.

ئەو پارەیێ کوژیکەکێ وێ ژێ ڤەببیت ب مەرجەکی ژ (٢ سانتیمەتران) زێدەتر نەبیت.

ئەو پارەیێن ژ دو پارچەیان پێکهاتین (ژمارەیێن وان جودا-جودا بن) لێ رووبەرێ وان نێزیکی رووبەرێ پارەیێ ئەسلی بیت و ب ئێکڤە هاتبنە گرێدان.

ئەو پارەیێن کێمتر ژ 50٪ یا رووبەرێ وان ژدەستدایی (ژێ چوویی).