گاڤ

بەرۆڤاژی وێ باوەرییا بەربەلاڤ کو دبێژیت گەرمکرنا زەیتا زەیتوونێ ب زیانە، ڤەکۆلینەکا نوی دەرئێخستییە، بکارئینانا زەیتا زەیتوونێ یا تەمام سروشتی ل دەمێ چێکرنا خوارنێ، نە بتنێ زیان نینە، بەلکو مفایێن ساخلەمییێ یێن خوارنێ دوقات دکەت و بهایێ وێ یێ خوارنێ بلند دکەت.

ڤەکۆلین کو د کۆڤارا زانستی یا "Food" دا هاتییە بەلاڤکرن، ئاشکرا کرییە کو برژاندن د فرنێ دا یان بکارئینانا "فرنا هەوایی" ل گەل زەیتا زەیتوونێ، دێ بیتە ئەگەرێ زێدەبوونا دوهنیاتێن نەتێر یێن ب مفا و کێمکرنا دوهنیاتێـن تێر یێن ب زیان. هەروەسان ئەڤ رێکە هاریکارییا پاراستنا پرۆتینان دکەت و ئاستێ دژە ئۆکسیدانان (antioxidants) دناڤ خوارنێ دا بلند دکەت.

ئەلیسا رامزی، پسپۆرا خوارنێ رۆهنکر، زەیتا زەیتوونێ ب دژە ئۆکسیدانان دەولەمەندە، ئەڤە ژی وەک قەلخانەیەکێ کار دکەن بۆ پاراستنا ڤیتامین و توخمێن خوارنێ یێن د ناڤ کەسکاتییێ دا ژ کارتێکرنێن خراب یێن پلەیا گەرمییێ یا بلند. هەروەسان رێگرییێ ل دروستبوونا پێکهاتەیێن ب زیان ل دەمێ گەرمکرنێ دکەن.

ڤەکۆلەران ل وەڵاتێ چیلی تاقیکرن ل سەر 42 جۆرێن کەسکاتییێ کرینە. دەرکەفتییە ئەو جۆرێن ب زەیتا زەیتوونێ و ب رێیا هەوایێ گەرم یان فرنێ هاتینە بەهەڤکرن، بلندترین کۆنترۆلا جۆری و بهایێ ساخلەمی هەبوویە هەڤبەری ل گەل وان جۆرێن کو د ناڤ زەیتەکا مەزن دا هاتینە سورکرن.

پسپۆر پێشنیاز دکەن ژ بۆ هندێ پترین مفا ژ زەیتا زەیتوونێ بهێتە وەرگرتن، باشترە دڤان جۆرێن خوارنان دا بهێتە بکارئینان: وەک قەرنابیت، گێزەر و پتاتێن شرین کو بتنێ پیچەکا زەیتا زەیتوونێ لێ دکەن و د گەرمکەرا هەوایی (Air Fryer) دا ددانن؛ هەروەسان ل شوینا سورکرنێ دناڤ زەیتێ دا، دشیاندایە ب رەشاندنا پیچەکا زەیتێ زەیتوونێ د ناڤ فرنییێ دا بەرهەڤ بکەن.

بکارئینانا پیچەکا کێم یا زەیتا زەیتوونێ ل گەل مریشکێ د ناڤ فرنییێ دا، ژەمەکێ تژی ژ پرۆتین و دوهنیاتێن تەندروست دابین دکەت بێی کو گەلەک کالۆرییان و یێن ب زیان بۆ لەشی زێدە بکەت.

بکارئینانا زەیتا زەیتوونێ یا تەمام سروشتی ل گەل ئامیرەیێن مۆدێرن یێن چێکرنا خوارنێ وەک فرن و Air Fryer، باشترین رێکە بۆ پاراستنا ساخلەمییا دلی و بدەستڤەئینانا ژەمەکێ دەولەمەند ب دژە ئۆکسیدانان.