گاڤ

وەزارەتا چاندنێ و ژێدەرێن ئاڤێ یا هەرێمێ، هوشداریەکا توند ددەتە وان بازرگان و خودانێن کێلگەهێن پەلەوەران ئەوێن دەرمانێ قەدەغەکری بکاردئینن. وەزارەتێ راگەهاندیە، لیژنەیێن وان ب هەڤکاری ل گەل هێزێن ئەمنی دەست ب هەوەکا چڕکریە و هەر کەسەکێ سەرپێچییێ بکەت دێ رویبروی سزایەکێ گران یێ یاسایی بیت.

پێنجشەمبییێ 26ێ شوباتا 2026ێ، وەزارەتا چاندنێ و ژێدەرێن ئاڤێ یا حکومەتا هەرێما کوردستانێ راگەهاندنەک بەلاڤکر و تێدا هایتیە، "ب مەرەما پشتڕاستبوونێ ژ کوالێتییا بەرهەمێ ناڤخۆیی، لیژنەیێن رێڤەبەرییا ڤێتێرنەری ب هەماهەنگی ل گەل سەندیکا و قایمقامییەتان ل هەمی پارێزگەهـ و ئیدارەیێن سەربخۆ، دەست ب پشکنینەکا هوبر یا دەرمانخانە و کێلگەهێن پەلەوەران کرینە".

وەزارەتێ دوپاتکر، "هەر کەسەکێ دەرمانێ قەدەغەکری یان بێ مۆلەت بکاربئینیت، ئێکسەر دێ هێتە دەستەسەرکرن".

وەزارەتا چاندنێ ئاماژە ب وێ یەکێ ژی دکەت کو هاوردەکرن و بکارئینانا دەرمانێ ڤێتێرنەری بتنێ دێ ل گۆرەیی رێنماییێن ژمارە 1 و 4 یێن سالا 2022 بن. د راگەهاندنێ دا هاتییە، "پاراستنا ساخلەمییا گشتی و ئاسایشا خوارنێ هێلا سۆرە و رێکێ نادەین چو کەسەک ژبەر بەرژەوەندییێن خۆ یێن تایبەت، مەترسییێ ل سەر ژیانا وەلاتییان و ناڤودەنگێ بەرهەمێ ناڤخۆیی دروست بکەت".

د پشکەکا دی یا راگەهاندنێ دا، وەزارەتا چاندنێ پشتراستییێ ددەتە وەلاتییان کو بەرهەمێ کێلگەهێن پەلەوەران یێن هەرێما کوردستانێ دبن چاڤدێریەکا توند دایە و ئەوا هاتییە گۆتن "بتنێ دەنگۆیە" و نەشێت ب رەنگەکێ گشتی ل سەر هەمی کێلگەهان بهێتە سەپاندن.

پێشتر دەزگەهێ ئاسایشا هەرێمێ راگەهاند، 16 کەس ب تۆمەتا بازرگانیکرن و دانا دەرمانێ فیورالتادۆن ب مریشکان د پەلەوەرخانەیان دا هاتنە دەستەسەکرن.

زیانێن فیورالتادۆن چنە؟

● بکارئینانا وی بۆ گیانەوەر و ئەو پەلەوەرێن کو گۆشتێ وان دهێتە خوارن قەدەغەیە.

● زیانێ دگەهینیتە DNAیێ کو ئەڤە دەستپێکەکە بۆ پەنجەشێرێ.

● ئەڤ دەرمانە بەرمایکێ کیمیایی AMOZ د لەشێ گیانەوەری دا بجهـدهێلیت.

● زیانێ دگەهینیتە بۆماوەیێ خانەیێن لەشی.

● چو ئاستەکێ سەلامەتییێ تێدا نینە و نابیت چو جاران و ب چو رێژەیەکێ بهێتە بکارئینان و دڤێت رێژەیا وی د گۆشت، هێک و خوارنێ دا 0% بیت.