گاڤ

وەزیرێ ساخلەمییێ یێ حکومەتا هەرێما کوردستانێ پشتراستییێ ددەتە وەلاتییان کو دەرمان و پێدڤییێن نۆشداری ب رادەیەکێ باش هەیە و رادگەهینیت؛ ئەو بۆ هەر پێشهات و ئەگەرەکێ نەخوازیار د بەرهەڤن.

دوشەمبییێ 2ێ ئادارا 2026ێ، د. سامان بەرزنجی، وەزیرێ ساخلەمییێ یێ حکومەتا هەرێما کوردستانێ راگەهاند، بىرهەڤی بۆ هەر پێشهات و ئەگەرەکێ نەخوازیار هاتینە کرن و وەلاتییان پشتراست دکەت کو ل کەرتێ گشتی و تایبەت، رادەیەکێ باش یێ دەرمان و پێدڤییێن نۆشداری ل نک کۆمپانی و کۆگەهان هەیە و پێدڤی ب دودلییێ ناکەت.

وەزیرێ ساخلەمییێ ئەو ژی دیارکر، پێدڤی ناکەت وەلاتی کۆژمەکێ زێدەتر ژ پێدڤی یێ دەرمانی بکڕن و عمبار بکەن، بەلکو تنێ ئەو ژەمێن ب وی رادەیێ ژ ئالییێ نۆشدارێ چارەسەرڤە بۆ وی هاتینە دەستنیشانکرن، بۆ دابینکرنێ. بەسن

ل دۆر بهایێ دەرمانی ژی د. سامان بەرزنجی ئاشکرا کر، چو دەرمان و پێدڤییێن نۆشداری گران نەبووینە، لەوما پێدڤییە وەلاتی ل دەمێ کڕینا دەرمان و پێدڤییان، پارەیەکێ زێدەتر ژ وی بهایی نەدەن یێ ل سەر ستیکەرێ حکومەتێ هاتییە دیارکرن.

هەروەسا گۆت: بزاڤ و ڕێکارێن زێدەتر دێ هێنە وەرگرتن بۆ دابینکرنا زێدەتر یا دەرمان و پێدڤییێن نۆشداری یێن پێدڤی بۆ نەخۆشخانە و ڤێراگەهشتن و هۆلێن نەشتەرگەرییان و چاڤدێرییا چڕ وەک پشکەک ژ پلانا ڤێراگەشهتنا بەرهەڤکری، د هەمان دەم دا هەمی رێڤەبەرییێن گشتی یێن ساخلەمییێ هاتینە راسپاردن بۆ بەرهەڤییێ ژبۆ پێشوازیکرنا ڤێراگەهشتنێن بلەز و ئێشکگرییا نۆشدار و کارمەندان.

د دویماهییێ دا وەزیرێ ساخلەمییێ دازانین، ل دەمێ پێدڤییا ڤێراگەهشتنێن بلەز، وەلاتی دشێن پەیوەندییێ ب ژمارە 122 یا ئەمبۆلانسێ بکەن، ل دەمێ دیتنا هەر سەرپێچی و کێمترخەمییەکێ ژی دشێن پەیوەندییێ ب هێلێن گەرم و سندۆقێن سکالایان بکەن.

ئەڤە لێدوانێن وەزیرێ ساخلەمییێ د دەمەکی دا نە، سێ رۆژێن هێرشێن ئەمریکا و ئسرائیلێ ب هەڤپشکی بۆ سەر ئیرانێ دەستپێکرینە و مەترسییێن گرتنا سۆران ئەگەرەکە کو دشیاندایە رویبدەت.