گاڤ

وەزیرێ دەرڤە یێ ئیراقێ رادگەهینیت، هەولێر رویبروی هێرشەکا چڕ بوویە و ب زێدەتری 70 مۆشەک و درۆنان هاتییە ئارمانجکرن، هەڤدەم وەزیرێ دەرڤە یێ ئیماراتێ ژی ئاشکرا دکەت کو وەلاتێ وی ب نێزیکی 800 مۆشەک و درۆنان هاتییە بۆمبەبارانکرن.

فوئاد حسێن، جێگرێ سەرۆکوەزیران و وەزیرێ دەرڤە یێ ئیراقێ د پەیوەندییەکا تەلەفۆنی دا ل گەل شێخ عەبدوللا بن زاید ئال نەهیان، وەزیرێ دەرڤەیێ ئیماراتێ، پێشهاتێن ئەمنی یێن مەترسیدار یێن دەڤەرێ گۆتوبێژ کرن و د وێ پەیوەندییێ دا وەزیرێ دەرڤەیێ ئیماراتێ ئاشکرا کر، وەلاتێ وی رویبروی نێزیکی 800 هێرشێن مۆشەکی و درۆنی بوویە کو ئارمانجا وان چەندین جهێن مەدەنی بوونە و ب چو رەنگان بەهانە بۆ وان هێرشان نینن و پێدڤییە دەملدەست بهێنە راگرتن.

ژ ئالییەکێ دی ڤە فوئاد حسێن دیارکر، ئیراق بوویە قوربانییا وی شەری و ژ ئالییێ ئالیێن جودا-جودا یێن ململانێیێ ڤە د هێتە بۆمبەبارانکرن و رەوشا ئەمنی ئالۆزتر بوویە، هەروەسان ئاماژە ب قەبارەیێ هێرشێن سەر هەرێما کوردستانێ کر و دازانین، تەێ باژێرێ هەولێرێ رویبروی زێدەتری 70 مۆشەک و درۆنان بوویە.

وەزیرێ دەرڤە یێ ئیراقێ ئەو ژی راگەهاند، تنێ هەولێر ئارمانج نینە، بەلکو ئالییێن دی یێن شەڕی پێگەهێن خۆ ل باشوور و رۆژئاڤایێ ئیراقێ کرینە ئارمانج، د هەمان دەم دا تەکەز ل هەلویستێ بەغدا کر بۆ چەسپاندنا ئاگربەستێ و کۆنترۆلکرنا ئالۆزییان ب مەرەما پاراستنا گیانێ خەلکێ سڤیل، ل دویماهیێێ ژی هەردو وەزیر ل سەر بەردەوامییا هەماهەنگییێ رێککەفتن دا کو دەڤەرێ ژ شەڕەکێ وێرانکەر دویربئێخن یا کو گەفان ل ئاسایشا هەرێمی و بەرژەوەندییا گەلان دکەت.