گاڤ

ئاژانسا ئەسۆشیەتێد پرێس رادگەهینیت، پشتی کوشتنا عەلی خامنەیی، سەرکردەیێن ئیرانێ د بزاڤێن بلەز دانە بۆ دەستنیشانکرنا جهگرەکێ نوی ژ ناڤا چەندین بەربژارێن توندرەو و ریفۆرمخوازان، د دەمەکی دا جڤاتەکا دەمکی وەلاتی ب رێڤە دبەت.

دوشەمبییێ 2ێ ئادارا 2026ێ، ئاژانسا ئەسۆشیەتێد پرێس د راپۆرتەکێ دا بەلاڤکرییە، پشتی کو عەلی خامنەیی، ڕێبەرێ بلند یێ ئیرانێ کو بۆ هەیاما 37 سالان حوکمرانی کری، د هێرشەکا ژ نیشکەکێ ڤە یا ئەمریکا و ئسرائیلێ دا هاتییە کوشتن، نوکە سەرکردەیێن وی وەلاتی د بزاڤەکا بلەز دانە بۆ تژیکرنا وی پۆستی، ئەڤە ژی دبیتە جارا دویێ ژ شۆرەشا ئیسلامی یا سالا 1979ێ وەرە کو رێبەرەکێ نوی دهێتە هەلبژارتن و رێبەرێ نوی گۆتنا دویماهییێ ل سەر هەمی بریارێن چارەنڤیسساز یێن شەڕ و ئاشتی و بەرنامەیێ ئەتۆمی هەیە.

د راپۆرتێ دا هاتییە دیارکرن، د نوکە دا جڤاتەکا دەمکی یا حوکمرانییێ کو ژ مەسعوود پزیشکیان، سەرۆککۆمار و غولامحوسێن محسنی ئێژەیی، سەرۆکێ دەستهەلاتا دادوەری و ئایەتوللا عەلی رەزا ئەعرافی، ئایینزانێ مەزن یێ شیعە پێکدهێت، د مەزنترین قەیرانا چەندین دەهـ سالێن بۆری دا سەرپەرشتییا وەلاتی دکەن و عەباس عێراقچی، وەزیرێ دەرڤە ژی ئاشکرا کرییە کو ل دەستپێکا ڤێ حەفتییێ دێ رێبەرەکێ نوی ژ ئالییێ جڤاتا 88 کەسی یا شارەزایان ڤە هێتە هەلبژارتن، لێ ژبەر کو خامنەیی کارتێکرنەکا مەزن ل سەر وان هەبوویە، پێشبینی ناهێتەکرن گوهۆرینەکا رهـ و ریشالی رویبدەت.

ئەسۆشیەتێد پرێس ل دۆر بەربژارێن سەرەکی یێن جهگرتنا خامنەیی دازانین، موجتەبا خامنەیی کورێ ڕێبەرێ پێشتر کو پەیوەندییێن بهێز ل گەل سوپایێ پاسداران هەنە، وەک جهگرەکێ ئەگەری د هێتە دیتن، لێ ژبەر کو کۆمارا ئیسلامی دژی حوکمێ بنەمالەیییە، رەنگە ببیتە ئەگەرێ نەرازیبوونێ، هەروەسان ئایەتوللا عەلی رەزا ئەعرافی، ئەندامێ جڤاتا دەمکی و سەرپەرشتیارێ حەوزێن زانستی ژی ئێکە ژ بەربژارێن دیار.

هەروەسان د راپۆرتێ دا ئاماژە ب ناڤێ حەسەن روحانی، سەرۆکێ پێشتر یێ ئیرانێ و ئەندازیارێ رێککەفتنا ئەتۆمی هاتییە کرن کو سەرباری دویرخستنا وی ژ جڤاتا شارەزایان، هێشتا وەک کەسایەتییەکێ میانرەو دهێتە بەحسکرن، د هەمان دەم دا حەسەن خومەینی، نەڤییێ دامەزرێنەرێ کۆمارا ئیسلامی ژی وەک بەربژارەکێ میانرەو د هێتە دیتن کو نوکە سەرپەرشتییا مەزارگەهێ باپیرێ خۆ دکەت.

ل دویماهییێ ژی ئاژانسێ دیارکر، ئایەتوللا محەمەد مەهدی میرباقری کو ئایینزانەکێ توندرەو و ئەندامێ جڤاتا شارەزایانە، وەک بەربژارەکێ دی د هێتە دیتن، ناڤهاتی نێزیکی میسباح یەزدییە و پشتەڤانییا بدەستڤەئینانا "چەکێن تایبەت" (ئەتۆمی) دکەت و ل دەمێ کۆرۆنایێ ژی دائێخستنا قوتابخانەیان ب پیلانگێری ب ناڤ کربوو.