گاڤ

dانەیا نەورۆز د دێربیا کوردستانێ یا خولا ستێرێن ئیراقێ دا سەرکەفتنەکا دراماتیکی ل سەر یانەیا دهۆکێ تۆمارکر، پشتی کو د چرکەیێن دویماهییێ دا ئەنجام گوهۆری و یاری ب ئەنجامێ 2-1 بر.

د گەڕا 20ێ یا خولا ستێرێن ئیراقێ دا، یاریگەها دهۆکێ مێهڤاندارییا یانەیا نەورۆز کر. سەرباری سارمایێ و دژوارییا سەقایی، هژمارەکا مەزن یا پشتەڤانان ل یارییێ بەرهەڤبوون و ئۆلتراسێن دهۆکێ ژبەر رەوشا سیاسی یا ئالۆز یا رۆژهەلاتا ناڤین و ناکۆکییێن دناڤبەرا ئەمریکا، ئیران و ئسرائیلێ دا، پەیاما ئاشتی و تەباییێ بۆ دەڤەرێ بلندکر.

نیڤا ئێکێ یا یارییێ بێ گۆل ب دویماهی هات، لێ نیڤا دویێ رویدانێن جودا-جودا ب خۆڤە دیتن. د خۆلەكا 54ێ دا محەمەد داودی پشتی ئەسێستەک ژ هاروون ئەحمەدی وەرگرتی، گۆلا ئێکێ و پێشکەفتنێ بۆ دهۆکێ تۆمارکر.

د خولەكا 73ێ دا رویدانەکا ب مەترسی رویدا دەمێ هاروون ئەحمەد، یاریکەرێ دهۆکێ، ژ ئەگەرێ قورچاندنا زمانێ خۆ رەوشا وی یا ساخلەمیێ تێکچوویی، ب ڤی ئەگەری یاریگەهـ هێلا و هاتە گوهۆرین.

نەورۆز د خولەكا 79ێ دا زڤری ناڤا سەقایێ یارییێ و نێتۆ تاکارایی ب لێدانەکا سەری یا جوان گۆلا وەکهەڤییێ تۆمارکر. د دەمەکێ دا یاری بەرەڤ ب دویماهی هاتنێ دچوو، ل خۆلەكا 1+90 دادڤان محەمەد سالحی پشتی زڤرییە ڤارێ (VAR)، لێدانەکا سزایێ (پەنەلتی) بۆ نەورۆز هژمارت. مەروان حوسێنی د خۆلەكا 2+90 دا ب سەرکەفتیانە لێدان بجهئینا و گۆلا سەرکەفتنێ بۆ نەورۆز تۆمارکر.