گاڤ

وەزارەتا خواندنا بلند راگەهاند؛ بریارا ئارەزومەندانە یا هژمارکرنا نمرەیا وانەیێن کوردی و عەرەبی هاتە هەلوەشاندن.

وەزارەتا خواندنا بلند یا حکومەتا هەرێما کوردستانی ئەڤرۆ رۆژا سێشەمبی 3-3-2026ێ د بەیانەکێ دا راگەهاند: ب پالپشت ب نویترین نڤیسارا سەرۆکاتییا جڤاتا وەزیران ل رێکەفتا 2026-2-26 و کۆنڤیسێ لژنەیا تایبەت یا جڤاتا وەزیران، وەزارەتا خواندنا بلند و ڤەکۆلینێن زانستی د نڤیسارەکا فەرمی دا بۆ وەزارەتا پەروەردێ روندکەت کو بریارا ئارەزوومەندانەیا هژمارکرنا نمرێن وانەیێن کوردی و عەرەبی هاتییە هەڵوەشاندن، و نمرێن ڤان هەردو وانەیان مینا وانەیێن دی دێ هێنە هژمارکرن بۆ وان قوتابیێن سالا خواندنێ یا 2025-2026 و سالێن دویڤدا ل پۆلا دوازدێ ئامادەیی دا، ئانکو ژ ئەڤ سالە و وێڤە نمرێن قوتابییێن پۆلا دوازدێ دێ ل سەر بنەمایێ هەر حەفت وانەیان بیت.

دا زانین: بۆ ڤێ مەرەمێ، ئەڤرۆ ب نڤیسارا ژمارە 4225 کو ئیمزایا د. ئارام محمد قادر وەزیرێ خواندنا بلند و ڤەکۆلینێن زانستی ل سەرە، ئاراستەی وەزارەتا پەروەردێ هاتییە کرن و تێدا هاتییە: ئاماژە ب نڤیسارەکا نوی یا سەرۆکاتیا جڤاتا وەزیران/ سەرۆکاتییا دیوانێ هاتییە کرن کو ب نڤیسارا ژمارە   702ل رێکەفتی 2026-2-26ئاراستەی وەزارەتا خواندنا بلند و ڤەکۆلینێن زانستی کرییە، کو پێکهاتییە ژ کۆنڤیسێ لژنەیا پێکئینایی ب بریارا ئەنجومەنێ وەزیران ژمارە 168 ل رێککەفتی 2026-9-7 دا، کو ناڤەرۆکا کۆنڤیسی دوپاتییێ ل سەر هەلوەشاندنا بریارا ئارەزوومەندانە یا هەژمارکرنا نمرێن وانەیێن کوردی و عەرەبی دکەت.

د نڤیسارا خۆ دا، وەزارەتا خویندنا بلند و ڤەکۆلینێن زانستی داخوازێ ژ وەزارەتا پەروەردێ دکەت کو هەمی قوتابخانە و خویندنگەهان جارەکا دی ئاگەهدار بکەن ب مەبەستا ئاگەهداربوونا قوتابیان.