گاڤ

مەسروور بارزانی سەرۆکوەزیرێن هەرێما کوردستانێ دەربارەی هێرشێن ل سەر هەولێرێ دهێنەکرن راگەهاند: هندەک ئالییێن ژ یاسایێ دەرچوویی و تیرۆرست هەولێر کرییە ئارمانجا خۆ داخوازێ ژ حکومەتا ئیراقێ دکەین رێگریێ ل ڤان تیرۆرستان بکەن.

مەسروور بارزانی سەرۆکوەزیرێن هەرێما کوردستانێ ئەڤرۆ رۆژا سێشەمبی 3-3-2026ێ د دەما ڤەکرنا نەخۆشخانەیەکی ل باژێرێ هەولێرێ بەحسا شەرێ نها یێ ل دەڤەرێ و ‌هێرشێن ل سەر هەولێرێ دهێنە کرن راگەهاند؛ جهێ داخێ یە دڤان چەند رۆژێن بۆری هندەک ئالییێن ژ یاسایێ دەرچوویی و تیرۆرست هەولێر کرییە ئارمانجا خۆ.

مەسروور بارزانی راگەهاند: دێ هەمی بزاڤان کەین کو خەلکێ کوردستانێ پاراستی بن و ژ هەمی شەر و ئالۆزییان دویربن.

سەرۆکوەزیرێن هەرێما کوردستانێ سوپاسییا خۆراگرییا خەلکێ کوردستانێ کر و گۆت: دێ بەردەوام بین ل سەر پاراستنا دەستکەفتێن خۆ و داخوازێ ژ خەلکێ هەرێمێ دکەم پابەندی رێنمایان بن و ب هەمی رەنگان خۆ بپارێزن، هیڤی دارم ئاسایش و سەقامگری جهێ شەرۆ ئالۆزییان بگرن

دەربارەی کێشەیا مووچەی ژی ل گەل حکومەتا فیدرال گۆت:  ئەم ل گەل حکومەتا بەغدا ل سەر خەتین بۆ ڤەدیتنا چارەسەرییەکا بنەرەتی، حکومەتا هەرێمی هەمی پابەندبوونێن خۆ بجهئیناینە، داخوازێ ژ حکومەتا فیدرال دکەین ئەو ژی پابەندبوونێن خۆ بجهبینن.

ل دیماهییێ ل دۆر کێشەیا نها یا کارەبێ ژی ئاماژە ب وێ یەکێ کر: هندەک کۆمپانییان بۆ خۆ پارێزیێ بەرهەمێن خۆ کێم کرینە ئەو یەک بوویە ئەگەرێ کێمبوونا بەرهەمئینانا کارەبێ ئەڤە تشەکێ کاتییە هیڤدارم خەلکێ مە بهێنفرەهبن و تێبگەهن کو ئەڤە رویدای دەرڤەی ئیرادەیا مەبوو.