گاڤ

سەرۆک نێچیرڤان بارزانی و وەزیرێ دەرڤە یێ تورکیا ب رێیا تەلەفۆنێ رەوشا دەڤەرێ گۆتوبێژ کر و دوپاتی ل هەماهەنگی و کارێ هەڤپشک دکەن.

سێشەمبییێ 3ێ ئادارا 2026ێ، سەرۆکاتییا هەرێما کوردستانێ راگەهاند، سەرۆک نێچیرڤان بارزانی، سەرۆکێ هەرێما کوردستانێ پەیوەندییەکا تەلەفۆنی ژ هاکان فیدان، وەزیرێ دەرڤە یێ تورکیا پێگەهشت و تێدا بەحسێ رەوشا دەڤەرێ کر.

ل گۆرەییبەیانەکا  سەرۆکاتییا هەرێمێ، د وێ پەیوەندییێ دا دویماهی پێشهاتێن رەوشا دەڤەرێ هاتنە بەحسکرن و هەردو ئالییان دوپاتی ل گرنگییا هەماهەنگی و کارێ هەڤپشک بۆ پاراستنا ئارامی و سەقامگیرییا دەڤەرێ کر.

هەروەسان پەیوەندییێن تورکیا ل گەل ئیراق و هەرێما کوردستانێ و چەند پرسێن گرنگ بۆ هەردو ئالییان، تەوەرەکێ دی یێ وێ پەیوەندییێ بوون.

ئەڤ پەیوەندییە د دەمەکی دایە، ژ رۆژا شەمبییێ 28ێ شوباتا 2026ێ وەرە، شەڕەکێ مەزن دناڤبەرا ئسرائیل و ئەمریکا ل گەل ئیرانێ ل دەڤەرێ دەستپێکرییە و کارتێکرنەکا مەزن ل سەر دەڤەرێ ب گشتی و هەرێما کوردستانێ ب تایبەتی هەبوویە.

ل گۆرەیی ئاماران، د چار ڕۆژێن شەڕێ ئەمریکا و ئسرائیل ل دژی ئیرانێ، 21 جار هێرش ل سەر هەرێما کوردستانێ هاتینە کرن، کو هەمی ل سنۆرێ پارێزگەها هەولێرێ بووینە و تنێ ئێک هێرش ل سنۆرێ پارێزگەها دهۆکێ بوویە. پارێزگارێ هەولێرێ ژی دبێژیت: "د وان هێرشان دا نێزیکی 100 درۆن و مۆشەکان هاتینە بکارئینان".