گاڤ

سەرۆکێ ئەمریکا رادگەهینیت، هندەک کەساتی بۆ سەرکرداتییا ئیرانێ هەنە کو گەلەک دباشن و بژاردەیێن وان بۆ رویبرویبوونا وی وەلاتی د بەرفرەهن، ددەتە زانین ژی؛ ئیرانێ هێزێن خۆ ژدەستداینە و نوکە داخوازا دانوستاندنێ دکەت.

سێشەمبییێ 3ێ ئادارا 2026ێ، دۆنالد ترەمپ، سەرۆکێ ئەمریکا راگەهاند، کۆمپانییێن بەرگرییێ بلەز کار بۆ دروستکرنا وان کەرەستەیێن جودا-جودا یێن مە پێدڤی هەیی دکەن، هەروەسان سەکۆیێن هاڤێتنا مۆشەکان ل ئیرانێ ل بەر ب دویماهیهاتنێنە.

سەرۆکێ ئەمریکا گۆت ژی: "هندەک کەساتی بۆ سەرکرداتییا ئیرانێ هەنە و هندەک ژ وان گەلەک دباشن، بژاردەیێن مە ژی بۆ رویبرویبوونا ئیرانێ د بەرفرەهن".

هەڤدەم هەر ئەڤرۆ ل تۆرا جڤاکی یا (تروس سۆشال) ئاماژە ب وێ کر، ئیرانی داخوازا دانوستاندنان دکەن، لێ دەم بسەرڤەچوویە و ئیرانێ سیستەمێ بەرگرییێ، هێزا ئەسمانی، هێزا دەریایی و سەرکردەیێن خۆ ژدەستداینە، "پشتی هەمی تشت ژدەستداین، نوکە داخوازا دانوستاندنان دکەن".

ژ ئالییەکێ دی ڤە، ترەمپ د دیدارەکێ دا ل گەل رۆژنامەیا (The Sun) یا بریتانی گۆت: "گەلەک جهێ داخێ یە دبینین پەیوەندییێن مە وەک بەرێ نینن. ئەمریکا بۆ هەلکرنا شەڕی ل رۆژهەلاتا ناڤین چو پێدڤی ب بریتانیا نینە".

هەروەسان رۆهن کر: "بێ گۆمان ئەڤە چ ژ رەوشێ ناگوهۆریت، لێ ڤیابا ستارمەر هاریکارێ مە با... ڤیابا وی کار کربا".

سەرۆکێ ئەمریکا دازانین ژی، قەت باوەر نەدکر ئەو پەیوەندییا ب "بهێزترین پەیوەندییا دیرۆکی" دهاتە وەسفکرن، ب ڤی رەنگی بکەڤیتە مەترسییێ دا.

د بەرامبەر دا ترەمپی پەسنا فرەنسا و ئەلمانیا کر و گۆت: "پەیوەندییا مە و بریتانیا د دیرۆکێ دا بهێزترین بوو، لێ نوکە ل گەل وەلاتێن دی یێن ئەورۆپا پەیوەندییەکا گەلەک بهێز هەیە".

ژ ئالییەکێ دی ڤە،رۆژنامەیا وۆل ستریت جۆرنال ژ زارێ بەرپرسێن ئەمریکی راگەهاند، دۆنالد ترەمپ ل هەمبەری پشتەڤانیکرنا وان گرۆپێن ل ئیرانێ ڤەکرییە کو بەرهەڤن چەکی هەلبگرن دا کو رژێمێ بئێخن.

هەمان رۆژنامەیێ دازانین ژی، "ترەمپ ئێکشەمبییێ ل گەل سەرکردەیێن کورد ئاخڤتییە و بەردەوام ژی ل گەل سەرکردەیێن خۆجهی د پەیوەندییاندایە کو دبیت مفایی ژ لاوازییا تەهرانێ وەربگرن دا کو دەستکەفتان بدەستڤەبئینن." ئەو ژی دیارکر، "کورد ل سەر سنۆرێ ئیراق و ئیرانێ خودان هێزەکا بەرچاڤن و ئسرائیلێ ژی پێگەهـ ل رۆژئاڤایێ ئیرانێ بۆمبەباران کرینە."