گاڤ

سەرۆکێ ئەمریکا د کۆمبوونەکێ دا ل گەل راوێژکارێ ئەلمانیا راگەهاند، هێزا سەربازی یا ئیرانێ "ئیفلیج بوویە" و ڕاوێژکارێ ئەلمانیا ژی دوپات کر، دەمێ وێ یەکێ هاتییە پلانا "رۆژا پشتی نەمانا رژێما تەهرانێ" بهێتە دانان.

سێشەمبییێ 3ێ ئادارا 2026ێ، دۆنالد ترەمپ، سەرۆکێ ئەمریکا ل کۆچکا سپی پێشوازی ل فرێدریش مێرتس، راوێژکارێ ئەلمانیا کر و کۆمەکا پرسێن هەستیار گۆتوبێژکر، د سەر هەمییان دا هێرشێن سەربازی بۆ سەر ئیرانێ، شەڕێ ئوکرانیا و پەیوەندییێن بازرگانی دناڤبەرا واشنتۆن و بەرلین دا.

ترەمپی بەحسێ زیانێن هێرشێن سەر ئیرانێ کر و گۆت: "نوکە ئیرانێ نە هێزا دەریایی مایە و نە ژی هێزا ئەسمانی، هەمی سیستەمێن وێ یێن رادارێ ژی ژناڤچووینە و هێزێن مە یێن سەربازی کارەکێ بێ وێنە کرییە".

سەرۆکێ ئەمریکا ئاماژە ب وێ یەکێ ژی کر، د ئێکەم هێرش دا ل رۆژا شەمبییێ 49 سەرکردەیێن بلند یێن ئیرانێ کرینە ئارمانج و د هێرشێن دی ژی دا سەرکرداتییا نوی کرییە ئارمانج، دیارکر ژی کو نوکە بەرپرسێن ئیرانێ داخوازا "پارێزبەندییێ" دکەن دا کو دەست ژ چەکی بەردەن و رەڤینە.

ل دۆر سەرکرداتییا پاشەرۆژێ یا ئیرانێ، ترەمپی ب شێوازەکێ کەنی ڤە گۆت: "پڕانییا وان کەسێن د هزرا مە دا بۆ سەرکرداتییێ، نوکە مرینە یان ژی هاتینە کوشتن"، ل دۆر کوڕێ شاهێ پێشتر یێ ئیرانێ ژی گۆت: "هندەک کەس حەز ژێ دکەن... لێ ئەم زێدە هزرا وێ یەکێ ناکەین، ب دیتنا من باشترە کەسەک ل ناڤخۆ بیت".

ژ ئالییێ خۆ ڤە فرێدریش مێرتس، ڕاوێژکارێ ئەلمانیا هیڤی خواست ئەو ئۆپەراسیۆنە دویماهییێ ب دەستهەلاتا نوکە یا ئیرانێ بئینیت و گۆت: "ئەم ل سەر لادانا ڤێ رژێما مەترسیدار یا تەهرانێ د هەڤراینە، لەوما دڤێت نوکە بەحسێ 'رۆژا پشتی وان' بکەین کا دێ چەوا بیت".