گاڤ

لیژنەیا بلند یا موەلیدەیان و کۆمەلەیا خودانێن موەلیدەیان و دیاردکەن، هەر ئەڤ شەڤە هەتا سێ رۆژێن دی دێ بێبەرانبەر کارەبێ دەینە وەلاتییان.

سێشەمبییێ 3ێ ئادارا 2026ێ، لیژنەیا بلند یا موەلیدەیان و کۆمەلەیا خودانێن موەلیدەیان ل پارێزگەها دهۆکێ بەیانەکا هەڤپشک بەلاڤکر و گۆت: ژبەر رەوشا نوکە یا هەرێما کوردستانێ تێدا دەرباز دبیت و کێمبوونا دەمژمێرێن کارەبا نیشتیمانی ب رەنگەکێ گشتی، ب بەرهەڤبوونا د. عەلی تەتەر پارێزگارێ دهۆکێ، قایمقامێ قەزا دهۆکێ، لیژنەیا بلند یا موەلیدان و کۆمەلەیا خودانێن موەلیدەیان کۆمبوونەک ل قایمقامییا قەزا دهوکێ هاتە برێڤەبرن.

ل گۆرەیی بەیانێ، دکومبوونێ دا بەحسل کارپێکرنا موەلیدەیان هاتە کرن دا کو وەلاتی ژ کارەبێ ل سنۆرێ قەزا دهۆکێ بێبەهرنەبن.

د بەیانا هەڤپشک دا هاتییە، بریار هاتە دان و خودانێن موەلیدان هاتنە راسپاردن، دوبارە موەلیدە بئێخنە کاری، دبێژیت ژی: بو وێ چەندێ کۆمەلەیا موەلیدەیان بریار دا هەر ژ ئەڤ شەڤە کار بۆ کارپێکرنا موەلیدەیان بهێتە کرن، بۆ هەیاما سێ روژان بێ بەرانبەر کارەب ب وەلاتییان بهێتە دان، ژدەمژمێر  پێنچی ئێڤاری هەتا  شەشی سپێدێ.

ل دۆر دەمژمێرێن بەردانا کارەبێ، لیژنەیا بلند یا موەلیدەیان و کۆمەلەیا خودانێن موەلیدەیان دازانین، ژ دەمژمێر 05:00 ئێڤاری هەتا 06:00 سپێدێ دێ کارەب بۆ وەلاتییان هێتە بەردان و ئەڤ بریارە هەتا شەشی مەهێ دێ بەردەوام بیت.

ل دویماهییێ گۆتییە: ئەگەر رەوش هەر ب ڤی رەنگی بیت ل روژا ئەینییێ دێ کۆمبوونەک هێتە برێڤەبرن و بو ڤێ مەرەمێ ژی دێ بەرنامەکێ رێکخستی ژ پێخەمەت بەرژەوەندییا گشتی هێتە دانان.

ژ ئالییێ خۆڤە، د. عەلی تەتەر پارێزگارێ دهۆکێ د کۆنگرەیەکێ رۆژنامەڤانی دا کو پەیامنێرێ گافێ یێ بەرهەڤبوو راگەهاند، هیڤیدارین خودانێن موەلیدەیان هەر ژ نوکە دەست ب هەلکرنا موەلیدەیێن خۆ بکەن، ئەڤە خێرەکا مەزنە و د هەیڤا رەمەزانێ دا تاعەتەکێ مەزنە.

پارێزگارێ دهۆکێ  هەروەسان دازانین، هەر خودان-موەلیدەیەکێ پێگر نەبیت، دێ تویشی سزایان بیت.