گاڤ

وەزیرێ دەرڤە یێ ئەمریکا پشتڕاست دکەت کو هێرش ل سەر کونسولخانەیا وان ل دوبەیی هاتییە کرن و رادگەهینیت، هەموی کارمەندێن خۆ ل بەغدا، هەولێر و بەیروت ڤەکێشاینە، هەروەسان دوپات دکەت، بەری دەستێ ئیرانێ بگەهیتە چەکێ ئەتۆمی، دێ کارگەهـ و هێزا وێ یا دەریایی ژناڤ بەن.

سێشەمبییێ 3ێ ئادارا 2026ێ، مارکۆ روبیۆ، وەزیرێ دەرڤە یێ ئەمریکا د لێدوانەکا ڕۆژنامەڤانی دا هویرکاتییێن رەوشا ئەمنی و گاڤێن سەربازی یێن وەلاتێ خۆ ل دژی کۆمارا ئیسلامی یا ئیرانێ ئاشکرا کرن.

روبیۆیی پشتراست کر، ب ڕێیا درۆنەکێ هێرش ل سەر گەراجێ ترومبێلان ل تەنشت ئاڤاهییێ کونسولخانەیا ئەمریکا ل دوبەیی هاتییە کرن و ژ بەر وێ یەکێ ئاگر بەربوویێ، لێ دوپاتی کر کو هەی کارمەندێن وان ب سلامەتن.

ل دۆر رەوشا دیپلۆماتکارێن خۆ ل دەڤەرێ، وەزیرێ دەرڤە یێ ئەمریکا راگەهاند: "مە ژمارەیا کارمەند و دیپلۆماتکارێن خۆ ل چەندین وەلاتێن رۆژهەلاتا ناڤین کێم کرینە، ب رەنگەکی کو نوکە ل بەغدا، هەولێر و بەیروتی چو کارمەندێن ئەمریکی نەماینە".

د پشکەکا دی یا ئاخڤتنێن خۆ دا، روبیۆ هێرشەکا توند کرە سەر دەستهەلاتدارێن ئیرانێ و گۆت: "ئەو دڤێن ل پشت بەرنامەیێ مۆشەکی و درۆن و تیرۆرێ خۆ ڤەشێرن هەتا دگەهنە چەکێ ئەتۆمی، لێ ئەم رێکێ ب وێ یەکێ نادەین".

روبیۆیی هەروەسان نەخشەرێیا وەلاتێ خۆ نیشان دا و گۆت: "ئەم دێ شیانێن وان بۆ پشتەڤانیکرنا تیرۆرێ ژناڤ بەین، کارگەهێن وان وێران کەین و هێزا وان یا دەریایی ژناڤببەین. ئەڤە ئارمانجێن مەنە و ئەم یێن ل سەر رێکێ بۆ بجهئینانا وان".

ل دۆر دەمێ هێرشێ ژی هوشداری دا: "ئەگەر نوکە ل وان نەدەین، سالەک یان سال و نیڤەکا دی کەس نەشێت دەستی بۆ ببەت و چ بڤێت دێ کەن، لەوما هەرچەندە بڕیارێ باج هەیە، لێ باجا وێ گەلەک کێمترە ژ وێ یەکێ ئیران ببیتە خودانا چەکێ ئەتۆمی".

دیار کر ژی، فەرماندەیییا ناڤەندی یا سوپایێ ئەمریکا (سێنتکۆم) د ئۆپەراسیۆنەکا هەڤپشک دا دێ هێرشێ کەتە سەر سەکۆیێن مۆشەکی یێن ئیرانێ و دێ هەمییان ژناڤ بەت.