گاڤ

ئەحمەد مووسا پەیڤدارێ وەزارەتا کارەبێ یا ئیراقێ راگەهاند، سیستەمێ کارەبا نیشتیمانی ل هەمی دەڤەرێن ئیراقێ هاتە ڤەمراندن و هەتا نوکە ئەگەر ناهێنە زانین.

چارشەمبییێ 4ێ ئادارا 2026ێ، ئەحمەد مووسا پەیڤدارێ وەزارەتا کارەبێ یا ئیراقێ راگەهاند،"ل سەرانسەری ئیراقێ سیستەمێ کارەبا نیشتیمانی ڤەمری، هەتا نوکە ئەم ب خۆ نزانین ئەگەرێ سەرەکی چییە."

پەیڤدارێ وەزارەتا کارەبێ ئاماژە ب وێ چەندێ ژی کر، هەرزوی ڤەکۆلین ل دۆر "ڤەمرینا گشتی" یا کارەبێ دەستپێکرینە و گۆت: "ل دەمێ هەبوونا هەر زانیارییەکا نوی و دیاربوونا ئەگەران، دێ رایا گشتی و هەمی ئالییان ئاگەهدار کەین."

ئەحمەد مووسا، گۆت ژی: "دەست ب دوبارە کارپێکرنا وێستگەهان و هێلێن جوداکری هاتییە کرن."

بەرهەمئینانا کارەبێ ل ئیراقێ نێزیکی 17 هزار مێگاواتا یە، د دەمەکی دا کو ل وەرزێ گەرمێ پێدڤی ب زێدەتر ژ 30 هزار مێگاواتان هەیە.

دویماهی جار ل 11-8-2025 ژبەر کێشەیەکا تەکنیکی، کارەبا ئیراقێ ل سەرانسەری وەلات ڤەمریبوو.