گاڤ

سەرۆک نێچيرڤان بارزانى ب رێیا تەلەفۆنێ ل گەل وەزيرێ دەرڤە یێ ئیرانێ دویماهی پێشهاتێن دەڤەرێ گۆتوبێژکرن و دیارکر، هەرێما کوردستانێ فاکتەرێ ئارامییێ یە و نابیتە پشکەک ژ هەڤرکییێن دەڤەرێ.

چارشەمبییێ 4ێ ئادارا 2026ێ، سەرۆکاتییا هەرێما کوردستانێ د بەیانەکێ دا راگەهاند، سەرۆک نێچیرڤان بارزانی د پەیوەندییەکا تەلەفۆنی دا ل گەل عەباس عێراقچی وەزیرێ دەرڤە یێ ئیرانێ ئاخفت.

ل گۆرەیی بەیانێ، د پەیوەندییێ دا سەرباری بەحسکرنا پەیوەندییێن کۆمارا ئیسلامی یا ئیرانێ ل گەل هەرێما کوردستانێ، دویماهی پێشهاتێن دەڤەرێ و دەرئەنجامێن وێ هاتنە گۆتوبێژکرن. د ڤی واری دا هەردو ئالییان تەکەز ل گرنگییا پاراستنا ئارامی و سەقامگیرییێ کر.

سەرۆکاتییا هەرێمێ هەروەسان دبێژیت: سەرۆک نێچیرڤان بارزانی دوپاتکر، هەرێما کوردستانێ نابیتە پشکەک ژ هەڤرکییان و وەک هەردەم دێ فاکتەرێ ئارامیێ بیت و پشتەڤانییێ ل بزاڤێن دیپلۆماسی دکەت بۆ کێمکرنا ئالۆزییان و دویرئێخستنا مەترسییێن شەڕی ژ گەلێن دەڤەرێ.

هەروەسا هەردو ئالییان داکۆکی ل پاراستنا ئاسایشا سنۆران کر، ب رەنگەکی ڕێگرییێ ل هەر بزاڤەکێ بۆ تێکدانا سەقامگیرییا دەڤەرێ و ئالۆزکرنا زێدەتر یا رەوشێ بهێتە کرن، ئەڤە ل گۆرەیی بەیانێ.