گاڤ

نڤیسینگەها راگەهاندنا سەرۆکوەزیران رادگەهینیت، فەرماندەیێ گشتی یێ هێزێن چەکدار سەرەدانا بارەگەهێ فەرماندەیا ئۆپەراسیۆنێن هەڤپشک کرییە و دیارکر، دێ لێپرسین ل گەل هەر ئالییەکی هێتە کرن کێمترخەمییێ د ئەرکێ خۆ دا بکەت.

چارشەمبییێ 4ێ ئادارا 2026ێ، نڤیسینگەها راگەهاندنا سەرۆکێ جڤاتا وەزیرێن ئیراقێ د بەیانەکێ دا راگەهاند، محەمەد شیاع سوودانی، فەرماندەیێ گشتی یێ هێزێن چەکدار سەرەدانا بارەگەهێ فەرماندەییا ئۆپەراسیۆنێن هەڤپشک کر.

 دبەیانێ دا هاتییە، سوودانی تەکەز ل وێ یەکێ کر، چو نەرمییەکێ نیشان نادەین ل هەمبەری هەر بزاڤەکێ بۆ راکێشانا ئیراقێ بۆ ناڤا شەڕی یان هەر تشتەکێ کو گەفان ل سەقامگیرییا وێ بکەت، هەروەسان بەحس ل وێ یەکێ ژی کر کو هێزێن چەکدار دێ ل سەر کارکرنێ بۆ ب هێزکرنا ئاسایشا نیشتمانی و پاراستنا وێ بەردەوام بن.

نڤیسینگەها راگەهاندنێ گۆتییە: سوزدانی بۆ سەرکردەیێن ئەمنی دیارکرییە، بەرپرسیارەتبیا یاسایی و ئەخلاقی وان پابەند دکەت ب وێ یەکێ بەرژەوەندییێن ئیراقێ ل سەری هەمی تشتەکێ دی دابین و ب هەمی بەرهەڤییان ڤە یاسایێ بسەپینن، رێکێ ب چو ئالییەکی نەدەن وەلاتی رابکێشیتە ناڤ ململانێ و گەفان ل سەقامگیرییا وێ بکەت.

فەرماندەیێ گشتی یێ هێزێن چەکدار فەرمان دا لێپرسین ل گەل هەر ئالی یان کارمەندەکێ ئەمنی بهێتە کرن کو کێمترخەمی د ئەرکێن وان دا دیارببیت، د ڤێ قویناغا گرنگ دا کو ئیراق و دەڤەر تێدا دەرباز دبیت، هەر د وێ چارچۆڤەیی دا فەرمان دا بەرپرسێن هەوالگرییێ ل فەرماندەییا ئۆپەراسیۆنێن دەشتا نەینەوا ژ کارێن وان بهێنە دویرئێخستن.

ژ سپێدەهییا رۆژا شەمبییێ 28ـێ شوباتێ، هێرشەکا بەرفرەهـ و هەڤپشک یا ئسرائیلێ و ئەمریکا بۆ سەر ئیرانێ دەستپێکرییە و هەر ژ وێ رۆژێ وەرە ناوچە کەفتییە د ئالۆزییێ دا.

هەڤدەم ژ ئالییەکێ دی ڤە، کەنالێ حەدەس یێ عەرەبی راگەهاند، دویرئێخستنا وان ژ ئەگەرێ وێ یەکێ بوویە کو وان هێزان هێرش کرییە سەر هەرێما کوردستانێ.