گاڤ

حکومەتا لوبنانێ بڕیارەکا ژ نیشکەکێ ڤە دەرکر ب قەدەغەکرنا هەر جۆرە چالاکییەکا سوپایێ پاسدارێن ئیرانێ ل سەر ئاخا خۆ، ئەڤ بڕیارە د دەمەکی دایە کو شەرێ دناڤبەرا حزبوللا و ئسرائیلێ ب توندی بەردەوامە.

پێنجشەمبییێ 5ێ ئادارا 2026ێ، پۆل مۆرکۆس، وەزیرێ راگەهاندنا لوبنانێ، پشتی کۆمبوونا جڤاتا وەزیران د کونگرەیەکێ ڕۆژنامەڤانی دا بڕیارێن نوی یێن وەلاتێ خۆ ئاشکرا کرن و راگەهاند: "جڤاتا وەزیران داخواز ژ وەزارەت و سازییێن پەیوەندیدار کرییە، رێنمایێن پێدڤی دەربکەن بۆ کۆنترولکرنا هاتنوچوون و مانا ئەندامێن سوپایێ پاسدارێن ئیرانێ ل لوبنانێ."

د بڕیارا حکومەتا لوبنانێ دا هاتییە دوپاتکرن، دڤێت ب توندی و بلەز ڕێگری ل هەر چالاکییەکا ئەمنی یان سەربازی بهێتە کرن کو ژ ئالییێ وان هێزان ڤە ل سەر ئاخا لوبنانێ دهێتە کرن. هەروەسان ئاماژە ب وێ یەکێ ژی دکەت: "پێدڤییە ئەو کەسە ژ ئالییێ دادگەهێن پەیوەندیدار ڤە بهێنە دەستەسەرکرن پاشی ژ وەلاتی بهێنە دەرئێخستن، بێی گوهدان پلە و ناسنامەیێن وان."

حکومەتا لوبنانێ بڕیارەکا دی ژی دا و "وەرگرتنا ڤیزایێ" لس ەر وەلاتیێن ئیرانی سەپاند. بەری نوکە وەلاتیێن ئیرانی بێی ڤیزا دشیان بچنە دناڤ ئاخا لوبنانێ دا، لێ ل دویڤ ڤێ بریارا نوی ئەو مافە ژێ هاتە ستاندن.

ئەڤ گاڤێن توند یێن حکومەتا لوبنانێ پشتی وێ یەکێ دهێن، کو شەڤا ئێکشەمبی ل سەر دوشەمبی، حزبوللایا لوبنانی ب دەهان مۆشەک و درۆنان هێرش کرە سەر ئسرائیلێ. حزبوللایێ راگەهاندبوو، ئەو هێرشە وەکو "ڤەکرنا تولێ" بوویە بۆ کوشتنا عەلی خامنەیی، رێبەرێ بلند یێ کومارا ئیسلامی یا ئیرانێ، کو ژ ئەنجامێ هێرشێن ئەسمانی یێن ئەمریکا و ئسرائیلێ بۆ سەر ئیرانێ ژیانا خۆ ژدەستدابوو.