گاڤ

دۆنالد ترەمپ، سەرۆکێ ئەمریکا دبێژیت، پێدڤییە د هەلبژارتن و دەستنیشانکرنا سەرکردەیێ بهێت یێ ئیرانێ دا پشکدار بیت و رۆل هەبیت، دروست وەک وێ یا ل ڤەنزوێلا رویدایی؛ ئاماژە ب وێ چەندێ ژی دا، موجتەبا خامەنەیی، کورێ عەلی خامەنەیی وەک جهگرێ بابێ خۆ "یێ قەبویلنەکرییە".

=پێنجشەمبییێ 5ی ئادارا 2026، سەرۆکێ ئەمریکا د هەڤپەیڤینەکا تەلەفۆنی یا 8 خۆلەکی دا ل گەل مالپەرێ ئەکسیۆس یێ ئەمریکی گۆت، ئیدارەیا وی دێ رێگرییێ ل هەر بزاڤەکێ کەت بۆ هێلانا سیستەمێ نوکە یێ تەهرانێ.

ترەمپی ئاماژە ب وێ کر، موجتەبا خامەنەیی نوکە وەک ب هێزترین بەربژارە بۆ جهگرتنا بابێ خۆ، لێ کەساتییەکێ "بێ کاریگەرییە" و نەشێت ئەو ئاشتی و تەباییا ئەمریکا دڤێت، بۆ ئیرانێ بزڤرینیت.

ترەمپی د وێ هەڤپەیڤینێ دا گۆت: "ئەو (ئیرانی) دەمێ خۆ ب هەروە ددەن. کورێ خامەنەیی کەسەکە کو کاریگەری نینە. دڤێت ئەز د پرۆسەیا دانانا سەرکردەیێ نوو دا پشکدار بم، دروست وەکی یا من ل گەل دێلسی رۆدریگێز ل ڤەنزوێلا ئەنجام کری."

سەرۆکێ ئەمریکا رەتکر کو چو سەرکردەیەکی قەبوییل بکەت کو هەمان سیاسەتێن عەلی خامنەیی، رێبەرێ بەرێ یێ کۆمارا ئیسلامی پەیرەو بکەت و گۆت: "ئەگەر هۆسا بیت، ل وی دەمی ئەمریکا دێ نەچار بیت پشتی 5 سالێن دی بزڤریتە جەنگی. مە کەسەک دڤێت ئاشتییێ بۆ ئیرانێ بئینیت."

سەرۆکێ ئەمریکا رەوشا نوکە یا ئیرانێ ب ڤەنزوێلا شوبهاند، کو تێدا پشتی گرتنا نیکۆلاس مادورۆیی ژ ئالییێ هێزێن ئەمریکی ڤە ل کانوونا دویێ یا بۆری، دێلسی رۆدریگێز هاتە سەر دەسهەلاتێ.

ترەمپی رۆژا چارشەمبییێ پەسنا رۆدریگێزێ کر و راگەهاند کو "دەست ب هنارتنا پەترۆلێ هاتییە کرن" بەرەڤ ئەمریکا.

هەروەسان ترەمپی د گۆتارا سالانە یا خۆ دا ڤەنزوێلا ب "دۆستا نوی" ناڤکر و گۆت، واشنتۆن پشتی ئۆپەراسیۆنا مادورۆیی پتر ژ 80 ملیۆن بەرمیلێن پەترۆلێ ژ وی وەلاتی وەرگرتینە.