گاڤ

فوئاد حسێن، وەزیرێ دەرڤە یێ ئیراقێ دبێژیت، هەرێما کوردستانێ ڕێ نادەت ئاخا وێ ل دژی چو وەلاتێن جیران بهێتە بکارئینان، ژ وان ژی کۆمارا ئیسلامی یا ئیرانێ.

ئەڤ گۆتنێن فوئاد حسێنی د کۆمبوونێ دا بوون ل گەل جانیت ئەلبێردا، بالیۆزا هۆلەندا ل ئیراقێ کو ئەڤرۆ پێنجشەمبی 5ی ئادارێ ل بەغدا هاتە کرن.

ل گۆرەیی بەیانەکا وەزارەتا دەرڤە یا ئیراقێ، فوئاد حسێنی د کۆمبوونێ دا ئاماژە ب وێ کریە کو نابیت ئاخا ئیراقێ بۆ هێرشکرنە سەر یا وەلاتێن جیران بهێتە بکارئینان و هەلویستێ حکومەتا هەرێما کوردستانێ ژی دوپات کرییەڤە کو هەرێما کوردستانێ ڕێ نادەت ئاخا وێ ل دژی چو وەلاتێن جیران بهێتە بکارئینان، ژ وان ژی کۆمارا ئیسلامی یا ئیرانێ.

ژ 28ێ شوباتا 2026ێ وەرە جەنگ دناڤبەرا کۆمارا ئیسلامی یا ئیرانێ و ئەمریکا و ئسرائیلێ دا دەستپێکریە.

فوئاد حسێنی د وێ کۆمبوونێ دا پابەندبوونا حکومەتا ئیراقێ ب پاراستنا نوینەراتییێن دیپلۆماسی و دیپلۆماتکاران دوپاتکرییە.