گاڤ

دۆنالد ترەمپ، سەرۆکێ ئەمریکا د نویترین داخویانییا خۆ دا ل دۆر پێشڤەچوونا ئۆپەراسیۆنێن سەربازی یێن وەلاتێ خۆ ل ناڤ ئیرانێ گۆت: "هێزا دەریایی یا ئیرانێ ژناڤچوویە و ئەو داخوازا رێککەفتنێ دکەن، لێ مە شەڕەکێ زێدەتر دڤێت."

رۆژا ئەینییێ 6ێ ئادارا 2026ێ، سەرۆکێ ئەمریکا ل پەراوێزا رێورەسمەکا کۆچکا سپی بۆ رێزلێنان ل یانەیا ئینتەر مەیامی راگەهاند، هێزا دەریایی یا ئیرانێ ب تەمامی "ژناڤچوویە." ترەمپی گۆت: "ب تنێ د هەیاما 3  رۆژان دا، مە 24 کەشتییێن جەنگی یێن ئیرانێ نوقمکرینە. نوکە وان نە هێزا ئەسمانی هەیە و نە بەرگرییا ئەسمانی."

هەرچەندە پاشی ئەدمیرال براد کووپەر، فەرماندەیێ سێنتکۆمێ راگەهاند، ژمارە بۆ 30 کەشتییان بلند بوویە.

ل گۆرەیی گۆتنا ترەمپی، هویربینییا هێرشان گەهشتییە ئاستەکی کو هەر مۆشەکەکا ژ ئالییێ ئیرانێ ڤە بهێتە هاڤێتن، د هەیاما کێمتر ژ 4 خۆلەکان سەکۆیا هاڤێتنێ ژ ئالییێ فرۆکەیێن ئەمریکی ڤە دهێتە ژناڤبرن. سەرۆکێ ئەمریکا ئاماژە ب وێ یەکێ کر کو نێزیکی 60٪ بۆ 64٪ ژ سەرجەمێ شیانێن مۆشەکی و پەیوەندیێن تەهرانێ ژناڤچووینە.

دۆنالد ترەمپی هەروەسان ئاشکرا کر، سەرکردەیێن ئیرانێ نوکە پەیوەندیسێ دکەن و پرسیار دکەن: "چەوا رێککەفتنێ بکەین؟" لێ بەرسڤا وی بۆ وان ئەڤە بوویە کو "هوین پیچەک گیرۆبوون." ترەمپی گۆت: "مە نوکە زێدەتر ژ وان دڤێت بجەنگین (شەڕی بکەین). 47 سالە ئەڤ وەلاتە د ترس و دودلییێ دا دژیت؛ 95٪ ژ وان سەربازێن ئەمریکا یێن کو دەست و پێیێن خۆ ژدەستداین، ژ ئەگەرێ قاسم سولەیمانی و رژێما ئیرانێ بوویە."

جەنگێ دناڤبەرا ئەمریکا - ئسرائیل و ئیرانێ دا کارتێکەرنەکا مەزن ل سەر بازارێن وزەیێ دروست کرییە. بهایێ پەترۆلا برێنت 4.9٪ و پەترۆلا تێکساس (WTI) 8.5٪ بلند بوویە. د بەرامبەر دا ترەمپی فەرمان ب دەزگەهێ دارایی یێ گەشەپێدانا ئەمریکا کر کو بیمەیا سیاسی بۆ هەمی وان کەشتیێن پەترۆلهەلگر دابین بکەت یێن کو د دەرتەنگا هورمز دا دەرباز دبن.

سەرۆکێ ئەمریکا راگەهاند، ئەگەر پێدڤی بکەت، هێزا دەریایی یا ئەمریکا دێ هەرزوی دەست ب پاراستن و یاوەریکرنا کەشتییێن بارهەلگر ل دەرتەنگا هورمز کەت هەتا کو گەرەنتییا لڤینا ئازاد یا وزەیێ بۆ جیهانێ بهێتە کرن.

ترەمپی گۆتە ئەندامێن سوپایێ پاسداران، سوپا و پۆلیسێن ئیرانێ، چەکێن خۆ دابنن و دیارکر: "ئەگەر هوین چەکی دابنن، دێ هەوە پارێزبەندییا تەمام هەبیت، ئەگەر نە، دێ روبرویێ مرنەکا مسۆگەر بن."

سەرۆکێ ئەمریکا هەروەسا داخواز ژ گەلێ ئیرانێ کر کو رابن و وەلاتێ خۆ وەربگرن و گۆت: "ئەڤە باشترین دەرفەتە بۆ ئیرانەکا نوی کو شیانێن مەزن هەبن." ترەمپی تەنانەت داخواز ژ دیپلۆماتکارێن ئیرانی ژی کر ل وەلاتێن جیهانێ داخوازا مافێ پەنابەرییێ بکەن و هاریکارییا ئەمریکا د دارێژتنا پاشەرۆژا وەڵاتێ خۆ دا بکەن.

ترەمپی دوپاتکر، ئارمانجا وی ئەوە ئیرانەکا نوی دروست ببیت کو ئێدی بۆ سەر ئەمریکا، ئسرائیل، سعوودیە، قەتەر و ئیمارات نەبیتە گەف. ترەمپی رەخنە ل دەستهەلاتا نوکە گرت کو تەنانەت مۆشەک ئاراستەیی وان وەلاتان ژی کربوون یێن دەست ل گەل نەهەیی. ترەمپی ب ڤێ رستەیێ دویماهی ب ئاخڤتنێن خۆ ئینا: "ئەگەر مە لێ نەدابا، دا ل مە دەن، ئەم هاتین و مە ئاهەنگ لێ تێ کدا."