گاڤ

جڤاتا دەمکی یا رێبەرییا ئیرانێ کۆمبوونا خۆ یا چارێ بڕێڤەبر. ل گۆرەیی میدیایا ئیرانێ، د کۆمبوونێ دا پلانا روینشتنا جڤاتا شارەزایێن رێبەرییێ و هەلبژارتنا رێبەرێ نوی یێ وەلاتی هاتییە دانان.

کۆمبوون ئەڤرۆ ئەینییێ 6ێ ئادارا 2026ێ، هاتییە کرن، میدیایا ئیرانێ پشتراست کرییە کو عەلی لاریجانی، سکرتێرێ جڤاتا بلند یا ئاسایشا نەتەوەیی یا ئیرانێ ژی تێدا پشکدار بوویە و راپۆرتا خۆ ل دۆر رەوشا جەنگی پێشکێشی جڤاتا دەمکی یا رێبەرییێ کرییە.

ل گۆرەیی زانیارییان، جڤاتا دەمکی یا رێبەرییێ بۆ "بهێزترکرنا" هێزێن چەکدار یێن ئیرانێ ل بەرامبەر هێرشێن ئسرائیل و ئەمریکا، هندەک بڕیار دەرکرینە.

هەڤدەم جڤاتا دەمکی یا رێبەرییا ئیرانێ د کۆمبوونێ دا پلانا برێڤەبرنا روینشتنا جڤاتا شارەزایێن رێبەرییێ و ناساندنا رێبەرێ داهاتی یێ ئیرانێ دانایە.

سپێدەهییا رۆژا ئێکشەمبییێ 1ێ ئادارا ئەڤ سالە جڤاتا بلند یا ئاسایشا نەتەوەیی یا ئیرانێ د بەیانەکێ دا کوشتنا عەلی خامنەیی، رێبەرێ کۆمارا ئیسلامی یا ئیرانێ د هێرشێن رۆژا 28ـێ شوباتێ یێن سوپایێ ئسرائیل و ئەمریکا دا پشتراست کر.

پشتی کوشتنا خامنەیی، جڤاتەکا سێ کەسی ب ناڤێ "جڤاتا دەمکی یا رێبەرییێ" هەتا هەلبژارتنا رێبەرەکێ نوی هاتییە پێکئینان، ئەرکێن رێبەری ب رێڤە دبەت. جڤات پێکدهێت ژ مەسعوود پزیشکیان، سەرۆککۆمار، غولام حسێن محسینی ئیژەیی، سەرۆکێ دەستهلاتتا دادوەری، عەلی رەزا ئەعرافی، ئەندامێ جڤاتا پاراستنا دەستوورێ ئیرانێ.