گاڤ

نوینەرێ رێبەرێ کوشتی یێ ئیرانێ د جڤاتا بەرگرییا وەلاتی دا هوشدارییێ د دەتە هەرێما کوردستانێ کو ل ئەگەرێ چوونا حزبێن رۆژهەلاتا کوردستانێ بۆ ناڤا وی وەلاتی، دێ هەمی سازییێن حکومەتێ بنە ئارمانج.

ئەینییێ 6ێ ئادارا 2026ێ، عەلی ئەکبەر ئەحمەدیان، نوینەرێ رێبەرێ کوشتی یێ ئیرانێ د جڤاتا بەرگرییا وەلاتی دا هوشدارییەک ئاراستەیی حکومەتا هەرێما کوردستانێ کر و راگەهاند، هەتا نوکە ب تە=نێ بارەگایێن ئەمریکا، ئسرائیل و حزبێن رۆژهەلاتا کوردستانێ ل هەرێما کوردستانێ کرینە ئارمانج، "بەلێ ئەگەر ئەو گرۆپ (حزبێن رۆژهەلاتا کوردستانێ) بهێنە ناڤ سنۆرێن ئیرانێ، ل وی دەمی دێ هەمی سازییێن هەرێما کوردستانێ بنە ئارمانج."

ئەحمەدیان ئاماژە ب وێ یەکێ کر، "هەمی فەرماندەیێن هێزێن چەکدار د بجهئینانا ستراتیژی و بەرنامەیا بەرگرییا تەڤئالی و نەهەڤسەنگ دا د بەردەوام بن و هەر ژێدەرەکێ گەفێ بۆ سەر ئیرانێ دکەنە ئارمانج."

وی نوینەرێ رێبەرێ بەرێ یێ ئیرانێ د جڤاتا بەرگرییا وەلاتی دا دوپات کرییە کو رێ دان ب دەربازبوونا ئەندامێن حزبێن رۆژهەلاتا کوردستانێ ب رامانا "پشتەڤانییا تەمام" یا هەرێما کوردستانێ یە بۆ وان و "وی دەمی ب بەرفرەهی دێ سازییێن وان بنە ئارمانج و دێ دویماهی ب پەیوەندییا دۆستانە و پشتەڤانییا کۆمارا ئیسلامی ل رۆژێن دژوار دا بۆ هەرێما کوردستانێ هێت."

3ـی تەباخا 2025، جڤاتا بلند یا ئاسایشا نەتەوەیی یا ئیرانێ بڕیارا دامەزراندنا (جڤاتا بەرگرییا وەلاتی) پەسەند کر کو مەسعوود پزیشکیان، سەرۆککۆمارێ ئیرانێ سەرۆکاتییێ دکەت و عەلی شەمخانی، شیرەتکارێ بلند یێ عەلی خامنەیی کو د هێرشێن رۆژا 28ـێ شوباتێ ئسرائیل و ئەمریکا دا هاتە کوشتن، سکرتێرێ جڤاتێ بوو.

ل ڤێ دویماهییێ میدیایەکا ئەمریکی ل سەر زارێ بەرپرسەکێ وەلاتی بەلاڤکر کو ئەندامێن حزبێن رۆژهەلاتا کوردستانێ دەست ب ئۆپەراسیۆنێ دژی ئیرانێ کریە، لێ هەرزوی ژ ئالییێ حکومەتا هەرێما کوردستانێ و سەرکرداتییا حزبێن ئەندام د هەڤپەیمانییا کوردستانی دا ئەو بانگەشە ب تەمامی هاتە رەتکرن.