گاڤ

وەزارەتا سامانێن سروشتی راگەهاند، شەڤا بۆری هێرشەکا تیرۆرستی ل سەر کێلگەها پەترۆلا ئێچ کەی ئێن (HKN) ل سنۆرێ پارێزگەها دهۆکێ هاتییە کرن و ژ ئەگەرێ وێ یەکێ زیان ب کێلگەهێ گەهشتییە و بەرهەمهئینانا پەترۆلێ تێدا هاتییە ڕاگرتن.

ئەینییێ 6ێ ئادارا 2026ێ، وەزارەتا سامانێن سروشتی یا حکومەتا هەرێما کوردستانێ د بەیانەکێ دا ئاشکرا کر: "شەڤا بۆری ژ ئالییێ گرۆپێن ژ یاسایێ دەرکەفتی ل ئیراقێ، هێرشەکا تیرۆرستی کریە سەر کێلگەها پەترۆلا ئێچ کەی ئێن ل سەرسنکێ ل سنۆرێ پارێزگەها دهۆکێ."

ل دۆر زیانان، وەزارەتا سامانێن سروشتی ئاماژە ب وێ یەکێ کرییە، ژ ئەگەرێ هێرشێ زیان ب کێلگەهێ کەفتییە و "بوویە ئەگەرێ راگرتنا بەرهەمهئینانێ تێدا."

وەزارەتا سامانێن سروشتی ب توندی ئیدانەیا هێرشێ کرییە و دبێژیت، ئارمانج ژێ "لێدانە ل ژێرخانەیا ئابۆری و سامانێ خەلکێ هەرێما کوردستانێ." هەروەسان دوپات دکەت کو "بەرپرسیارەتییا ڤێ هێرشێ د ستۆیێ وی ئالی دا یە کو ل دەڤەرێن ژێر دەستهەلاتا وی ڤە هێرش د هێتە کرن و زیانێ دگەهیننە هەرێمێ و داهاتێ هەمی ئیراقێ."

ل دویماهییا بەیانێ، وەزارەتا سامانێن سروشتی داخوازێ ژ حکومەتا فیدرالی یا ئیراقێ دکەت رێگرییێ ل ڤان جۆرە هێرشان بکەت کو "خەلکێ مەدەنی، ژێرخانەیا ئابۆری و کەرتێ پەترۆل و گازا هەرێما کوردستانێ" دکەنە ئارمانج.

کێلگەها پەترۆلا ئێچ کەی ئێن (HKN) دکەڤیتە سنۆرێ ناحییا سەرسنکێ ل پارێزگەها دهۆکێ، ئێکە ژ کێلگەهێن چالاک یێن بەرهەمهئینانا پەترۆلێ ل هەرێما کوردستانێ. شەڤا بۆری ب سێ درۆنان هێرش ل سەر هاتییە کرن و ب وێ ئەگەرێ بەرهەمهئینانا پەترۆبێ تێدا راوەستییا.