گاڤ

فەرمانگەها راگەهاندنا پەرلەمانێ ئیراقێ، بەرنامەیێ کارێ روینشتنا رۆژا دوشەمبییێ بەلاڤکر و ئاماژە ب وێ دایە، روینشتن سوبەهی دێ ل دەمژمێر 9ێ شەڤ هێتە برێڤەبرن.

ئێکشەمبییێ 8ێ ئادارا 2026ێ، فەرمانگەها راگەهاندنا پەرلەمانێ ئیراقێ، د بەیانەکێ دا راگەهاند: بەرنامەیێ کارێ روینشتنا سوبەهی دوشەمبییێ، دێ تایبەت بیت ب سویندخوارنا دەستووری یا هژمارەکا پەرلەمانتارێن جهگر و دەنگدان ل سەر ئەندامێن لیژنەیێن پەرلەمانی، هەڤدەم دێ چەند گفتوگۆیێن گشتی ژی هێنە کرن.

پەرلەمانێ ئیراقێ د روینشتنا بۆری دا ب مەرەما گۆتوبێژکرنا رەوشا ئیراقێ و دویماهی پێشهاتێن دەڤەرێ، ب بەرهەڤبوونا فەرماندەیێن بلند یێن لەشکەری و ئەمنی یێن ئیراقێ کۆمبوو.

بەلێ پەرلەمانتارێن نێزیک ژ گرۆپێن چەکدار یێن ئیراقێ بۆ خۆ ب دەرفەت دیت، دا کو درویشمێن دژی ئەمریکا و ئسرائیلێ ببێژن و پشتەڤانییا خۆ بۆ ئیرانێ و وان گرۆپێن چەکدار یێن ئیراقێ دوپات بکەن یێن کو ژ دەستپێکا شەڕێ دناڤبەرا ئیران، ئسرائیل - ئەمریکا وەرە بەردەوام هێرشێن مۆشەکی و درۆنی کرینە سەر هەرێما کوردستانێ.