گاڤ

وەزارەتا بازرگانییا ئیراقێ ل دۆر رەوشا ئاسایشا خوارنێ پشتراستییێ ددەتە وەلاتییان و رادگەهینیت، سەرباری ئالۆزییێن دەڤەرێ، رەوشا خوارنێ ل وەلات جهگیرە و د بن کۆنترۆلێ دا یە. پەیڤدارێ وەزارەتێ ژی دبێژیت، "گەنمێ پێدڤی بۆ سال و نیڤەکا دی د کۆگەهان دا یێ هەیی."

دوشەمبییێ 8ێ ئادارا 2026ێ، محەمەد حەنوون، پەیڤدارێ وەزارەتا بازرگانییا ئیراقێ، راگەهاند: "دۆسیەیا ئاسایشا خوارنێ ژ کارێن هەرە د پێشییێ یێن حکومەتێ یە؛ کۆگەهێن مە خودان یەدەگەکێ ستراتیژی یێ مەزن یێ کەرەستەیێن خوارنێ یێن سەرەکی نە وەکی برنج، شەکر، زەیت (روین) و پاقلەمەنی، هنارتنا کەلوپەلان ژی بۆ پشکاخوارنێ یا مەهانە یا وەلاتییان ب شێوەیەکێ رێکخستی یا بەردەوامە."

ل دۆر بەرهەمێ گەنمی ژی، محەمەد حەنوونی ئاشکرا کر، یەدەگێ گەنمی ل ئیراقێ د رەوشەکا گەلەک باش دایە و هەتا دویماهییا سالا 2026ـێ تێرا پێدڤییێن ناڤخۆیی دکەت، ئەڤ چەندە ژی "سەقامگیرییا بەرهەمئینانا ئاری و دابینکرنا گەنمی بۆ ئاشان مسۆگەر دکەت."

پەیڤدارێ وەزارەتا بازرگانییا ئیراقێ بەحس ل رێکارێن پێشوەخت کر بۆ رویبرویبوونا هەر قەیرانەکا هەرێمی و گۆت: "ئەم کار بۆ بهێزکرنا پتر یا یەدەگێ ستراتیژی و رێگریکرن ل بلندبوونا بهایان و قۆرخکارییێ د ناڤ بازاران دا دکەین."

هەروەسان ئاماژە ب وێ چەندێ ژی کر کو پلانەکا نوس بۆ دروستکرنا سایلۆیێن سەردەم و وێستگەهێن نوی یێن عمبارکرنا دەخلودانی دەستپێکرییە.

محەمەد حەنوونی داخواز ژ وەلاتییان کر "نەکەڤنە بن کارتێکرنا پڕوپاگەندەیان و پێدڤی ناکەت خوارنەکا مەزن ل خۆ کۆم بکەن، چونکی بازار د پڕن ژ کەلوپەلان." دوپاتی ژی ل وێ چەندێ کر کو حکومەت ب هویری چاڤدێرییا پێشهاتان بۆ پاراستنا سەقامگیرییا رەوشا خوارنێ ل وەلاتی دکەت.