گاڤ

وەزارەتا دارایی یا هەرێما کوردستانێ، بریارەکا دەستەیا گشتی یا گومرکا ئیراقێ ل دۆر دەرگەهێ ناڤدەولەتی یێ ئیبراهیم خەلیل ل پارێزگەها دهۆکێ رەت دکەت و "پشتراستییێ" ددەتە بازرگانان، کو رێکارێن گومرکێ ل وی دەرگەهی دێ وەکی بەرێ بن.

دەستەیا گشتی یا گومرکا ئیراقێ، ئەڤرۆ رۆژا دوشەمبییێ بریارەک دا و راگەهاند، بۆ هەیاما سێ مەهان دێ هێتە بجهئینان و گومرک و سپاردەیێن دارایی یێن باجێ ل دەرگەهێ ئیبراهیم خەلیل بەری حەوالەکرنا دۆلاری بۆ هاوردەکرنا کەلوپەلان دێ هێنە رادەستکرن و ئەو پارە دێ ل سەر هژمارا بەنکی یا دەستەیا وان هێتە دانان. ئێڤارا ئەڤرۆ دوشەمبییێ د بەیانەکێ دا وەزارەتا دارایی و ئابۆری یا هەرێما کوردستانێ ئەو بریارە رەتکر.

د بەیانا وەزارەتا دارایی یا هەرێما کوردستانێ دا هاتییە: "بەلاڤکرنەکا دەستەیا گومرکێن ئیراقێ ل دۆر ب خۆڤە ڤەگرتنا بابەتێن (خوارن و دەرمانان) د چارچۆڤەیێ سیستەمێ ئەسیکۆدا دا و وەرگرتنا رەسم و باجێ بۆ هژمارا گومرکێن ئیراقێ، یان باجێ ل دەرگەهێ ناڤدەولەتی یێ ئیبراهیم خەلیل کو ب رێیا "بەیانا پێشوەخت" بۆ هەیاما 3 مەهانە و ل 32-05-2026 ب دویماهی دهێت. بۆ هەمی بازرگانان، کۆمپانییان و رایا گشتی رۆهن دکەین، کو ئەڤ بەلاڤکرنە بەروڤاژی خالا هەشتێ یە ژ بریارا ژمارە 569 یا جڤاتا وەزیرێن حکومەتا فیدرال، کو ئاماژەیێ ب وێ یەکێ ددەت، وەرگرتنا رەسمێ گومرکی ل وان نڤیسینگەهێن گومرکی بیت یێن کەلوپەل ژێ دهێنە هاوردەکرن."

وەزارەتا دارایی دبێژیت: دەستەیا گومرکێن ئیراقێ د وێ بریارا خۆ دا چ جۆرە هەماهەنگییەک ل گەل حکومەتا هەرێما کوردستانێ نەکرییە.

دەستەیا گشتی یا گومرکێن ئیراقێ، بریار دایە کو بۆ سێ مەهان ڕێ بهێتە دان خوارن و دەرمان ژ دەرگەهێ ئیبراهیم خەلیل ژ هەرێما کوردستانێ بهێنە هاوردەکرن، لێ دڤێت رێکارا رادەستکرنا گومرکا پێشوەخت بیت و پاشان مامەلە بهێنە پاکتاوکرن.

وەزارەتا دارایی یا هەرێما کوردستانێ ئاماژە ب وێ یەکێ کریە: "ئەم بازرگان و کۆمپانییێن دەرمان و خوارنێ پشتراست دکەین، کو رێکار ل گومرکا دەرگەهێ ناڤدەولەتی یێ ئیبراهیم خەلیل دێ ب هەمان میکانیزما بەرێ د چارچۆڤێ یاسا و رێنماییان دا هێنە بجهئینان."

سامر قاسم داوود، رێڤەبەرێ گشتی یێ دەستەیا گشتی یا گومرکا ئیراقێ راگەهاند، دەستەیا وان بریار دایە کو خوارن و دەرمانێن دهێنە هاوردەکرن ب رێیا دەرگەهێ ئیبراهیم خەلیل، سیستەمێ گومرکا پێشوەخت ب خۆڤە بگریت؛ ئاماژە ب وێ ژی کر کو "ئەڤ بریارە دێ بۆ هەیاما سێ مەهان کار پێ هێتە کرن هەتا 31ێ گولانێ. ئەڤ رێکارە دێ وەکی هەمی دەرگەهێن دی یێن ئیراقێ هێتە بجهئینان."

رێڤەبەرێ گشتی یێ دەستەیا گشتی یا گومرکا ئیراقێ راگەهاند، ئەو بریارە د چارچۆڤەیێ رێکخستنا پرۆسەیا هاوردەکرنێ و بهێزکرنا شیانێن رێکارێن گومرکی دایە.

ل 25ێ چریا دویێ یا 2025ێ، حکومەتا فیدرال دەست ب کارکرنێ ل دۆر رێکارێن گومرکا پێشوەخت ل دەرگەهێن سنۆری یێن ئیراقێ کر، دڤێت بازرگان، گومرک و باجا کەلوپەلێ هاوردەکری ب شێوەیەکێ پێشوەخت رادەست بکەت و ب رێیا سیستەمێ ئەسیکۆدا کۆدەکێ وەرگریت دا کو ڕێ پێ بهێتە دان کەلوپەلێ وی ژ دەرگەهێن سنۆری دەرباز بیت.

سامر قاسم داوود راگەهاند، ل گۆرەیی وێ بریارێ، دێ رێکارێن تایبەت ب پاقژکرنا بازرگانی (پاکتاوی) پاشی هێنە کرن، پشتی کو بەلگەنامەیێن تایبەت ب بار و مامەلا گومرکی یا کو ژ دەرگەهێ ئیبراهیم خەلیل دەرکەفتی، ل دویڤ هەمان رێکار بیت، یا کو نوکە ژ ئالییێ دەستەیا گشتی یا گومرکێ و بەنکا ناڤەندی ڤە دهێتە پەیرەوکرن بۆ حەوالەیێن دەرڤە و ئەڤ رێکارە بۆ ب ساناهیکرنێ یە دئینان و ڤەگوهاستنا کەلوپەلێن سەرەکی دا، ب شێوەیەکێ کو ل گەل پێدڤییێن ئابۆری و بازرگانی یێن وەلاتێ بگونجیت.

رێکارا گومرکا پێشوەخت وەکریە کو هندەک بازرگان ل هەرێما کوردستانێ پەنایێ بۆ دۆلارێ بەنکا ناڤەندی نەبەن ژ ئەگەرێ گرانییا رێکاران و کارکرن ب سیستەمێ ئەسیکۆدا، یێ کو هەتا نوکە ل هەرێما کوردستانێ کار پێ ناهێتە کرن.