گاڤ

وەزارەتا دەرڤە یا ویلایەتێن ئێکگرتی یێن ئەمریکا بریار دا بالێ سوودانی یێ رێکخراوا ئیخوان موسلیمین بئێخیتە دناڤ لیستا رێکخراوێن تیرۆرستی یێن بیانی دا. وەزیرێ دەرڤە یێ ئەمریکا، ئەو رێکخراوە ب کرنا کۆمکوژی و سێدارەدانا ب کۆم یا وەلاتییێن سڤیل تۆمەتبار کر و راگەهاند کو ئێکسەر ژ ئالییێ سوپایێ پاسدارێن ئیرانێ ڤە مەشق پێ دهێتە دان و پشتەڤانی لێ دهێتە کرن.

دوشەمبییێ 9ێ ئادارا 2026ێ، مارکۆ رۆبیۆ، وەزیرێ دەرڤە یێ ئەمریکا، ل هژمارا خۆ یا فەرمی ل تۆرا جڤاکی یا (ئێکس) نڤیسییە: ئیخوان موسلیمین یا سوودانێ، کو ژ ئالییێ سوپایێ پاسدارێن ئیرانێ ڤە مەشق پێ دهێتە کرن و پشتەڤانی لێ دهێتە کرن، ژ ئالییێ وەزارەتا دەرڤە یا ئەمریکا ڤە وەک رێکخراوەکا تیرۆرستی یا بیانی (FTO) و تیرۆرستێ جیهانی یێ دەستنیشانکری یێ تایبەت هاتە ڤاڤارتن.

وەزیرێ دەرڤە یێ ئەمریکا ئەگەرێ ڤێ بریارا توند ڤەگەراند بۆ دەست ل گەل هەبوونا وێ رێکخراوێ د تاوانێن گران دا دژی مرۆڤاتییێ، و راگەهاند کو ئیخوانێن سوودانێ ژ "سێدارەدانا ب کۆم یا وەلاتیێن سڤیل بەرپرسیارن".

رۆبیۆیی هوشودارییەکا توند ئاراستەیی تەهران و وێ رێکخراوێ کر و تەکەز ل سەر ستراتیژییا پاشەرۆژا واشنتنێ کر و گۆت: ئەم دێ بەردەوام بین ل سەر بکارئینانا هەمی وان ئامرازێن د بەردەستێ مە دا بۆ بێبەهرکرنا ئیرانێ و لقێن ئیخوان موسلیمین ژ وان ژێدەرێن کو پێدڤی نە بۆ دەست ل گەل هەبوونا د تیرۆرێ دا یان پشتەڤانیکرنا وێ.

کۆما ئیخوان موسلمین (برایێن موسلمان) کی نە؟

کۆما ئیخوان موسلمین، کو ب ناڤێ "برایێن موسلمان" ژی دهێتە نیاسین، ئێکە ژ کەڤنترین و کاریگەرترین بزاڤێن ئیسلامی یێن سیاسی ل جیهانا ئیسلامی. ئەڤ رێکخراوە ل سالا 1928 ل باژێرێ ئیسماعیلییە ل مسرێ ژ ئالییێ مامۆستایەکی ڤە ب ناڤێ حەسەن بەننا ڤە هاتییە دامەزراندن.

ئارمانج و هزرا وان:

ئارمانجا سەرەکی یا ئیخوان موسلمین دامەزراندنا دەولەتەکێ بوو کو ل سەر بنەمایێن شەریعەتێ ئیسلامی بهێتە برێڤەبرن. درویشمێ وان یێ ناڤدار "ئیسلام چارەسەرییە" (الإسلام هو الحل) بوو.

ل دەستپێکێ، بزاڤا وان پتر ل سەر کارێن خێرخوازی، پەروەردەکرنا جڤاکی و بانگەوازا ئایینی بوو دا کو جڤاکەکا ئیسلامی ئاڤا بکەن. لێ ل گەل بۆرینا دەمی، وان خۆ د سیاسەتێ دا ژی دیت و بوونە هێزەکا سیاسی یا کاریگەر.

بەلاڤبوون و کارتێکرن:

هەرچەندە ل مسرێ دەستپێکر، هزرا ئیخوانان بلەز ل گەلەک وەلاتێن دی یێن عەرەبی و ئیسلامی بەلاڤبوو، وەکی ئوردن، سووریێ و فلستینێ (بزاڤا حەماس وەک لقەکا وان دهێتە هژمارتن) و وەلاتێن دی. بوونە خودان کارتێکرنەکا مەزن ل سەر گەلەک بزاڤێن ئیسلامی ل سەرانسەری جیهانێ.