گاڤ

سەرۆکوەزیرێن ئیراقێ، پیرۆزباهی ل موجتەبا عەلی خامنەیی کر ب هەلکەفتا هەلبژارتنا وی وەک رێبەرێ بلند یێ نوی یێ کۆمارا ئیسلامی یا ئیرانێ و باوەرییا خۆ یا تەمام ب شیانێن دەستهەلاتا نوی یا تەهرانێ بۆ دەربازکرنا ڤێ قویناغا هەستیار دیار کر.

دوشەمبییێ 9ێ ئادارا 2026ێ، محەممەد شیاع سوودانی، سەرۆکێ جڤاتا وەزیرێن ئیراقێ، بەیانەک ل دۆر پێشهاتێن سیاسی یێن کۆمارا ئیسلامی یا ئیرانێ و دەستنیشانکرنا رێبەرێ نوی یێ وی وەلاتی بەلاڤکر.

د دەستپێکا بەیانێ دا، سوودانی ئاماژە دا و گۆت: "ئەم پیرۆزباهییێ ئاراستەیی موجتەبا عەلی خامنەیی دکەین ب هەلکەفتا هەلبژارتنا وی وەک رێبەرێ بلند یێ کۆمارا ئیسلامی یا ئیرانێ."

سەرۆکوەزیرێن ئیراقێ ئاماژە ب رویدانێن بەری نوکە کر و گۆت: "د دەمەکی دا کو ئەم سەرەخۆشییێن خۆ بۆ شەهیدبوونا عەلی خامنەیی و ئەندامێن مالباتا وی و هەمی گەلێ ئیرانێ دکەین، د هەمان دەم دا ئەم باوەرییا خۆ یا تەمام ب شیانێن رێبەرییا نوی یا کۆمارا ئیسلامی یا ئیرانێ بۆ برێڤەبرنا ڤێ قویناغا هەستیار دیار دکەین."

هەروەسان تەکەز ل سەر گرنگییا بهێزکرنا ئێکرێزییا گەلێ ئیرانێ کر دا کو رویبروی وان ئاستەنگان ببن یێن نوکە هینە د رێکا وان دا.

د پشکەکا دی یا بەیانێ دا یا کو تایبەتە ب هەلویستێ فەرمی یێ دەولەتا ئیراقێ هەمبەری پێشهاتێن دەڤەرێ، محەممەد شیاع سوودانی دوپات کر: "جارەکا دی تەکەزێ ل سەر هەڤسۆزییا ئیراقێ و راوەستیانا وێ مل ب ملێ کۆمارا ئیسلامی یا ئیرانێ دکەین."

ل دویماهییێ، سەرۆکوەزیرێن ئیراقێ هوشداری ژ بەردەوامییا شەڕی دا و راگەهاند، ئیراق پشتەڤانییێ ل هەمی وان گاڤان دکەت یێن ئارمانجا وان ب دویماهیئینانا ناکۆکییانە، هەروەسان ئۆپەراسیۆنێن لەشکەری ل سەر سەروەرییا ئیرانێ رەت دکەت، ب رەنگەکی سەقامگیرییێ بۆ هەمی وەلاتێن دەڤەرێ بپارێزیت و سلامەتییا گەلێن هەڤال مسۆگەر بکەت.

سپێدەهییا ئەڤرۆ دوشەمبییێ 9ێ ئادارا 2026ێ، جڤاتا دەمکی یا شارەزاییان راگەهاند، کو ل گۆرەیی ماددەیێ 108 یێ دەستووری، ئایەتوللا سەید موجتەبا حسێنی خامنەیی وەک سێیەم رێبەرێ بلند یێ ئیرانێ هاتە هەلبژارتن و داخواز ژی ژ هەمی گەلێ ئیرانێ کر کو بەیعەتێ بدەنە رێبەرێ نوی.