شەمال ئاکرەیی

دەما پەرتووکەک بیرھاتنێن ب ئێش یێن چل ژ زیندانیێن سیاسی ب دەنگەکێ کز ڤەدگێڕیت و پێکڤە کۆم دکەت و قیژییەکا بلند و ب هێز. بلندتر ژ هەر کەرب و کینەکێ، ب هێزتر ژ هەر دیکتاتۆر و ستەمکارەکی، ژێ دەردکەڤیت و ویژدانێن نڤستی هشـیار دکەت و گازی بێدەنگییا مرۆڤایەتیێ دکەت و دبێژژیتێ: ئەڤە دلۆپەکە ژ دەریایەکێ رۆندکێن داییک و جەرگ سوتییان! هینگی پەرتووک د چارچووڤەیێ خۆ یێ نۆرمال دا نامینیت؛ بەلکو دبیتە دیدەڤان و  گرۆڤ و بەلگەنامەیەکا زیندی خۆ ل ناڤچاڤێن مرۆڤایەتییا بێ روومەت، ئەوا رەوشتێ خۆ ژ دەستدای ددەت و د بیتە پرسیارەک خەوێ ژ چاڤان د هەڕمینیت و هەوار دکەت: چەوا مرۆڤەک دشێت ببیتە ئامرازەکێ ئەشکەنجە و ئازاردانا برایێ خۆ یێ مرۆڤ؟

(زڤڕینا دەمی) پەرتووکەکە، تێدا وێنەکرنەکا هوور هەیە ژ بۆ میکانیزما ئەشکەنجەدان و سەرکوتکرنێ د زیندانێن رژێما بەعسا گۆڕ ب گۆڕ دا.  د ئەڤێ پەرتووکێ دا چل کەس چیرۆکێن خۆ ڤەدگێڕن. ئەڤ چل کەسە، چەند نموونەیەکن ژ زنجیرەیەکا درێژ یا ناڤان کو ل هەمبەری زۆلم و ستەم و تەپەسەریێ، ب جورئەتڤە راوەستییاین چونکی باوەڕکرییەکا بێ هەڤتا ب دۆزا خۆ هەبوویە، لەوڕا خۆ یێ هاڤیتییە د مەیدانا خەباتا رێکخستنێن نهینی یان چووینە د بەرهنگاربوونەکێ دا کو ببوونە سەهم و سافەکا مەزن ژ بۆ دەزگەهێن هەواڵگری و ئەمنا رژێمێ و سیخۆڕ و دووڤەلانکێن وێ.

ل دەمەکی کو جیرانی باوەڕی ب جیرانی، بابی ب کۆڕی، مامۆستای ب قوتابی، دوکانداری ب بکڕی و خزم و کەسوکاران ب ئێکودو نەدهات، ئەڤان کەسێن د ناڤ جەرگێ نەیاران دا، پەیاما خۆڕاگری و هەبوونێ، هەر ئێکی ب رەنگەکی، دگەهاند و ل سەر دفنا داگیرکەر و خۆفرۆشان، خەباتا خۆ ئەنجام ددا. ل وی سەردەمی چاڤ ل سەر ھەموو جھـ و مالان هەبوون، سیخۆڕ و چاڤێن خۆفرۆتییان، پشکەک بوون ژ وی سیستەمێ ترسێ یێ رژێمێ ب شارەزاهییەکا داریژتی، پیلانکری، پیس و بێبەخت دروستکری.

ل دووڤ شاهدی و دیدەڤانێن د پەرتووکێ دا ھاتین، دەزگەهێن بەعسییان دۆسیەیێن ڤان خەباتکاران ب ھشیاری ئامادە دکرن. ئەگەر نە گەهشتبانە چ بەلگە و گرۆڤان ل دژی وان، دا تۆھمەتان ژ بن ئەردی بۆ دارێژتن و دروست کەن و گرۆڤ و بەلگەیێن ساختە و درەو دیزاین کەن داکو بکەنە بەهانە بۆ گرتن و ئەشکەنجەدانا وان. لەوڕا تۆمەتێن پێش وەخت ئامادە چێدکرن و ئەو کەس ب تومەتێن "ئەندامبوونێ د "رێکخراوەکا نهێنی" دا ئان ب "پیلانگێران ل سەر دەولەتێ" دەستەسەر دکرن.

بەلێ د پترییا حالەتان دا، قوربانی ئەو کەس بوون یێن بێهنا کوردینیێ ژێ دهات و ئەندام د رێکخراوێن کوردستانی یێن خەباتکەر و نەیارێن رژێمێ دا بوون کو ب نهێنی کار دکرن و ژ بۆ بەرەڤانیکرنێ ژ دۆزا خۆ یا نەتەوەیی و مرۆڤایەتی تێدکۆشین.

ھەر چیرۆکەکا د ڤێ پەرتووکێ دا خۆدیکەکە کو قەبارێ وێ هۆڤێتییا د ناڤ زیندانان دا ھاتییە کرن نیشان ددەت. زیندانێن بەعسییان ئانکو ئەو جهێن کو لەش تێدا دبوونە ئەزموونێن سزادانێ، گـیان دبوونە ئارمانجا ئەشکەنجەدانێ ب کارەبێ، سۆتنێ، لێدانا ب بۆری و قامچییان، بێ خەوکرن و گەفێن دەستدرێژیکرنێ. ئەڤە رێکێن هۆڤانە بوون یێن کو ویژدانێن زیندی بۆ د هەژیێن.

ئەو تشتێ، ڤان جۆرە پەرتووکان ژ پەرتووکێن دی، جودا دکەت نە ب تنێ دیمەنێن دلتەزین یێن ئێشاندنێ نە، بەلکو ئەو بانگێ مرۆڤایەتیێ یێ بەرخۆدێرە یێ کو د هەر شەهادەیەکا د پەرتووکێ دا دهلدێریت. دەما هەر زیندانییەک سەرھاتییا خۆ ڤەدگێڕیت، وی نە ژ بۆ هندێ یە داکو ل سەر رابووریێ خۆ بگریت، بەلکو دا سیستەمێ ستەمێ یێ کو دڤییای ئیرادەیا مرۆڤی ژناڤ ببەت، تازی و رویس بکەت.

بەرهەڤکاری پەرتووکێ، ئەحمەد یاسین بەندی شیوازەکێ بەلگەیی یێ سادە بکارئینایە، لێ د راستگۆیا خۆ دا یێ ب ئێشە چونکی نڤیسەری ھێلایە ھەر زیندانییەک ب رێکا خۆ، ب دەڤۆکا خۆ و ب  پەیڤێن خۆ یێن کو  دەربڕینێ ژ ئازارێن ناخێ وی دکەن و بێی گوهۆڕین ومایتێکرن ڤەگێڕیت. ڤێ سادەبوونێ بھایەکێ بەلگەیی و مرۆڤایەتی یێ کێم وێنە دایە پەرتووکێ. ئەڤ ڤەگێڕانە نە درووشمن هاتینە بلندکرن، نە گۆتارێن کارتێکەرن هاتینە دارێژتن، بەلکو ب تنێ چەند چیرۆکێن راست و دروستن ژ دەریایا ئەشکەنجە دیتییان و ژ دلێن ب ئێش و ماندی دەر دکەڤن.

زمان د پترییا چیرۆکان دا د ناڤبەرا ریالیزمییا راست و ھۆزانڤانییا ب رۆندکان تژی، دایە. دیوار، دەرگەهێن ئاسنی و تاریاتی، ھێمایێن بەرخۆدانێ و ترس و ڤەقەتیانێ نە ل ھەمبەر، پەیڤێن باوەڕی ب خۆبوونێ، بێھنفرەھیێ و خەونا ئازادیێ دووبارە دبن. ئەڤ ساخلەتە وەکى ئاگرێ بەرخودانێ نە کو ڤەمراندنێ رەد دکەت.

*: ئەڤ پەرتووکە ژ دارشتن و بەرهەڤکرنا نڤیسەرێ هێژا (ئەحمەد یاسین بەندی) یە سرۆشێ وێ  ژ بەرنامەیێ (زڤڕینا دەمی) یێ (گاڤ) کو رۆژنامەڤان (دلژار عەدنان) دیدار ل گەل (٤٠) ژ زیندانیێن سیاسی یێن کورد ئەنجام دابوون.