گاڤ

رێکخراوا ساخلەمییا جیهانی (WHO) راگەهاند کو شەڕ و ئالۆزییێن ل دەڤەرێ بووینە ئەگەرێ قەیرانەکا مەزن یا ساخلەمییێ و مەترسی ل سەر ژیانا ملیۆنان کەسان دروست کریە.

ئەڤ هوشدارییە د دەمەکی دا دهێت کو ب هزاران کەس ل ئیرانێ هاتینە کوشتن و ب دەهان هزار کەس ژی ئاوارە بووینە، کو ئەڤێ یەکێ فشارەکا مەزن ئێخستییە سەر کەرتێ ساخلەمییێ.

رێکخراوێ دیار کر کو کێمییا دەرمان و پێدڤییێن نۆشداری گەهشتییە ئاستەکێ مەترسیدار، ب تایبەت پشتی کو گەشتێن ئەسمانی و بازرگانی ژ بەر شەڕی هاتینە راوەستاندن. ژ لایەکێ دی ڤە، ویلایەتێن ئێکگرتی یێن ئەمریکا ب فەرمی پەیوەندییێن خۆ ل گەل رێکخراوا ساخلەمییا جیهانی بڕینە، کو ئەڤێ یەکێ دلگرانی ل دەڤەرێ دروست کریە دەربارەی پاشەرۆژا هاریکارییێن نۆشداری و بەرهنگاربوونا نەخۆشییێن ڤەگر. شارەزا هوشدارییێ ددەن کو رەوشا شەری ل گەل ڤێ بریارێ دێ کاریگەرییەکا نەرێنی ل سەر پرۆسەیا دابینکرنا ڤاکسین و دەرمانان ل وەلاتێن هەژار کەت. د هەمان دەم دا، رێکخراوا ساخلەمییا جیهانی داخواز ژ هەمی ئالییان کر کو رێڕەوێن مرۆڤی ڤەکەن دا کو دەرمان و پێدڤییێن نۆشداری بگەهنە دەستێ بریندار و نەخۆشان، ب تایبەت ل وان دەڤەرێن کو شەڕ تێدا یێ بەردەوامە.

ئەڤ تێکچوونا رەوشا ساخلەمییێ د دەمەکی دایە کو پێشتر ژی رۆژهەلاتا ناڤین ژ دەست کێمییا خزمەتگوزارییێن نۆشداری دنالی، لێ شەڕێ ئەمریکا و ئسرائیل ل گەل ئیرانێ کو ل 28ێ شوباتێ دەستپێکر، هەمی هیڤییێن ئارامکرنا رەوشێ ژ ناڤ برن. نوکە زێدەتر ژ 46% ژ دەرمانێن سەرەکی ب تەمامی ل هندەک دەڤەران نەماینە، کو ئەڤە ژی مەترسییەکا جدی یە ل سەر ژیانا زارۆک و پیران و وەلاتییان ب گشتی.