گاڤ

یانەیا بەرشەلۆنا یا ئسپانی بزاڤێن خۆ دەستپێکرینە دا کو د هاڤینا بهێت دا گرێبەستەکا دیرۆکی ل گەل ستێرا نایجیری و هێرشبەرێ یانەیا گالاتاسەرای، ڤیکتۆر ئۆسیمین، ئیمزا بکەت.

ئەڤرۆ رۆژا شەمبی، 14-03-2026، راپۆرتێن وەرزشی یێن ئەورۆپی ئاشکەرا کرن کو خوان لاپۆرتا، سەرۆکێ یانەیا بەرشەلۆنا، ئۆسیمین کرییە ئارمانجا خۆ یا سەرەکی و بەرهەڤە هەمی بودجەیا ڤەگوهاستنان بۆ ڤێ گرێبەستێ خەرج بکەت. ئەڤ بزاڤا بەرشەلۆنا د دەمەکی دا دهێت کو یانەیا گالاتاسەرای داخوازا 100 ملیۆن یۆرۆیان دکەت بۆ دەستبەرداربوونا ژ ڤی یاریزانی، کو نوکە ئێکە ژ باشترین هێرشبەرێن جیهانێ.

ئەڤ لڤینا بەرشەلۆنا پشتی وێ یەکێ دهێت کو رکابەرییا یانەیێن وەک ریال مەدرید و مانچستەر یونایتد بۆ بدەستخستنا ئۆسیمین زێدە بوویە. شارەزا دیار دکەن کو سەرکەفتنا لاپۆرتا د ڤێ گرێبەستێ دا دێ بیتە وەرچەرخانەکا مەزن بۆ پاشەرۆژا یانەیێ. چاڤەڕێ دهێتەکرن کو د رۆژێن بهێت دا دانوستاندن گەرمتر لێ بهێن و بەرشەلۆنا ب فەرمی دەست ب بزاڤێن خۆ بکەت بۆ بدەستخستنا ڤی هێرشبەری.

ئەڤ گرێبەستە د دەمەکی دایە کو هاندەرێن بەرشەلۆنا چاڤەڕێی ستێرەکا نوینە دا کو هێلا هێرشبەرییا یانەیێ بهێزتر لێ بکەت. ئەگەر ئۆسیمین پەیوەندییێ ب یانەیا کەتەلۆنی بکەت، دێ بیتە گرانترین گرێبەستا یانەیێ د چەند سالێن دویماهییێ دا و دێ بارەکێ گران ل سەر ملێن راهێنەری راکەت.