مللەت عسمەت

"مەها رەمەزانێ و ڤەگەراندنا کلتووری"

دناڤ کلتوورێ گەلێن جیهانێ دا چو گەل هندی گەلێ کوردستانێ ب هەمی پێکهاتەیێن خۆ ڤە د دەولەمەند و هەروەسان ژی د بێ پلان و پرت و بەلاڤ نینن. ئەم نازڤرینە ژانا بێ-دەولەتییێ لێ هەتا دبینە دەولەت مە پێدڤی ب هەر جۆرە هێزەکێ ژ هێزێن(رەق، نەرم، زیرەک) هەیە و هێزا کلتووری ژی د سەردەمێ نوی دا چو ژ هێزا چەکی کێمتر نینە، بەلکی چەک بشێت دەڤەرەکێ  بگریت یان رزگار کەت لێ مەژی ب چەکی نەدهێتە کۆنترولکرن نەژی دهێتە رزگارکرن.. مەژی پێدڤی ب هزرێ یە و هزر ژی پێدڤی ب پەروەردەیەکا ساخلەم و دەمدرێژ و ستراتیژی هەیە.

ژبلی وێ یەکێ کو راگەهاندنێ ئەرکێن جودا-جودا یێن "گەهاندنێ و سەربەرخۆیی و بێئالیبوونێ هەنە"، ژ ئالییێ کاریگەرییێ ڤە دشێت جوانییان دروست بکەت، رایا گشتی بەرهەم بئینیت و وێنەیێ هزری یێ کاریگەر نەبتنێ بۆ وەلاتێ مە بەلکی بۆ جیهانێ هەمییێ ژی بەرهەم بئینیت.

بزاڤا دراما خۆمالی یا ئازاد ل پشتی سەرهلدانا بهارا سالا 1991ێ دەستپێکر، لێ مخابن ژبەر کاودانێن نەجهگیر د شیاندا نەبوو بەردەوامی ب دراما خۆمالی یا کوردی بهێتە دان و دەستێن دراما بیانی یا وەکی ژەهرا هزری گەهشتنەمە، د ڤان سالێن دویماهیێ دا کەنالێن خۆمالی و ئەسمانی یێن کوردی یێن کو شیاین د هندەک وەرزان دا دەستبهاڤێژنە ڤێ بزاڤا خۆمالی و وەک ئامرازەکێ کاریگەر بگەهیننە جڤاکێ، ئەڤ گاڤە جهێ دەستخوشیێیە ب تایبەتی د مەها رەمەزانا پیرۆزدا ژبەر کو پترییا جڤاکێ موسلمانن ڤێ گاڤێ دهاڤێژن هەر چەندە پێدڤییە دراما بۆ هەمی پێکهاتەیان و هەمی وەرزان بیت.

د مەها رەمەزانا پیرۆز یا ئەڤ سالە دا 2026ێ کەنالێن کوردی هژمارەکا درامایان پێشکێشکرن. لێ ئەم شیاین بینەرێن درامایێن (ئادیابین یا کوردستان تیڤی، گەوهەر و خویشکەکانی یا ئاڤا میدیا و دێ چێ بیت یا ئاڤا بەهدینان و ڕێ یا وار تیڤی) بین. ئەڤ نموونەیێن جودا ب گشتی د ڤان درامایان دا ئەڤ خالە دهاتنە نیشان دان:

● ڤەگەراندنا رەسەناتییێ و روحا نیشتیمانی ب زمانێ رەسەن یێ کوردی جاران رەخنە ل بکارئینانا پەیڤێن بیانی هەبوون لێ ئەڤە ژی نیشانا هشیارییا جڤاکێ و گەهشتنا پەیاما درامایێ یە.

● بهایێن جڤاکێ ڤەژاندن، مخابن ژ کلتوورێ دەولەمەند یێ جڤاکێ مە کۆچک و سەرایێن ئیناینە باژێران.. و ئەڤ خالە هێشتا پێدڤییە.

● سیناریۆیێن خۆمالی ب خامەیێن زێرین یێن کچ و کوڕێن کوردستانێ دلێ مە شاد دکەت.

● دەرکەفتنا کارکتەرێن نوی یێن هونەری و شیانێن وان یێن بێ-وێنە گاڤەکا پیرۆزە و پیرۆزباهییێ ل هەمییان دکەین و ب هەبوونا بەرهەمی دێ مە ستێرێن کوردستانی و ب وێ هیڤییێ جیهانی ژی هەبن.

● دەستنشانکرنا برینان گرنگییا بابەتی یە، هەتا دەستێ خۆ نەدانینە سەر برینان و نەگڤێشین، برینێن مە نائێشن و خوین ژێ ناهێت و هەتا خوین ژێ نەهێت ناهێنە پاقژکرن.

ل دویماهییێ ڤان درامایان ئەم برینە دناڤ جەرگێ شۆرەشا کوردستانێ دا ب مخابنی ڤە دیرۆک نەوەک پێدڤی دهێتە خواندن و نەوەک پێدڤی دهێتە نڤیسین، ئەم ل کێشەیێن جڤاکی هشیارکرین، ئەم هەمی دبێژین دێ چێ بیت؟ لێ کێم ژمە خەباتێ بۆ دێ چێبوونێ دکەن.. ڤان درامایان ئەم برینە کۆلانێن باژێرێ رەسەن یێ کو مستەک ژ بیرهاتنێن مە و ئەم هەمی خۆزییان بۆ بەرێ رادهێلین ژبەر کو ئەڤرۆ ئەم دئێک ناگەهین، دا ئیکدو بگەهین بتنێ هزرا خۆمالییە کو بەرهەمێ خۆمالی بەرهەم بئینیت و بەرهەمێ خۆمالی هەر تشتی و ب تایبەتی دراما خۆمالی بەرهەم دئینیت و دێ مە گەهینیتە وەلاتەکێ خۆمالی.