‏

‏شرۆڤەکارێ سیاسی: رەمزی سیسۆ

‏کوشتنا عەلی لاریجانی بوومەلەرزەیەکا مەزنتر بوو ژ کوشتنا عەلی خامنەیی؛ ئەو زەلامێ هەمی کارەك بۆ ئیرانێ ئەنجام ددا و برێڤەدبر ل ناڤخۆیا ئیرانێ وەک تەڤنێ تەڤنپیرکێ بوو و ژ دەرڤەیا ئیرانێ سیاسیەکێ خودانسام و ژیر بوو. ژبەرکو ئەمین سندووقێ خامنەیی بوو. ساناهی نینە کەسەكێ شیان هەبن ب رۆلێ ناڤبری راببیت و جهێ وی پر بکەت و کوشتنا عەلی لاریجانی رویدانەکا دیرۆکییە بۆ ئیسرائیلێ و ژ گرنگترین رویدانانە و ژ گرنگترین پێنگاڤێن سەربازییە کو ب دژی ئیرانێ بهێتەهەژمارتن.

‏دەمێ تەل ئەبیبێ کوشتنا عەلی لاریجانی سکێرتێرێ جڤاتا بلند یێ ئاسایشا ئیرانێ بەلاڤ کری، ب دلەکێ خوەشڤە و دەمێ بۆ جارا ئێکێ لاریجان هاتبوو دیتن د رووپیڤانا رۆژا قوودسێدا و لاریجانی کەسەکێ زۆر گرنگ بوو کو هەمی سیستەمێ ئیرانێ ل بنڤە برێڤە دبر و رۆلەکێ سەرەکی هەبوو د رێکخستنا کارێ حکومەتێ و چارەسەرکرنا  کێشەیێن ناڤخۆیی. هەر دیسان هەمی سیستەمێ ئالۆزییێن ئیرانێ ب کەسەك وەك لاریجانی دهاتنەکۆنترۆلکرن. ل ئیرانێ سازییێن مەدەنی ژ لایێ سەرۆك کۆماریڤە دهێنەرێڤەبرن و بێگومان ل ژێر چاڤدێرییا رابەری، لاریجانی هەروەسا بابەتێ ئاسایش و ئابووری و پاسداران برێڤەدبر و ب شێوەیەکی سەرکەڤتییانە، ئەڤ کارێن هە بۆ هندێ دکرن داکو دژایەتی نەکەڤیت د ناڤخۆیا ئیرانێدا و گەلەک هشیار بوو ل سەر ڤێ چەندێ و هەول ددان پێکڤە و ب ئێكدەست کار بکەن... ژبەر ڤان کار و چالاکییێن لاریجانی ب سندووقا نهێنییا سەرکەڤتنا خامنەیی دهاتەناسکرن.

‏ب کورتی لاریجانی زەلامێ سیستەمێ ناڤخۆییا ئیرانێ بوو و هەمی بەرپرسێن ئیرانێ دبێژن بۆ دیتنا خامنەیی پێدڤی ب چ مۆلەتان نەبوو، ئێکسەر دچوو نک و رێکا وی یا ڤەکریبوو ژبەرکو رێڤەبەرێ ڤەگوهاستنا زانیارییان و دامەزراندنا بەرنامەیێ ئەتۆمی بوو و هەروەسا رێکخستنا دانوستاندنێن دبلۆماسی دکر و زێدەباری کو ناڤخۆییا ئیدارێ دکر و د هەمی کارێن خوەدا سەرکەڤتی بوو لەورا هەمی دەمان بزاڤا کوشتنا وی دهاتەکرن

‏عەلی لاریجانی بەرپرس بوو ژ ئێكگرتنا سيستەمی سياسی و ئيداری يێ كۆمارا ئيسلامییا ئيرانی و ب تنێ ئـــەڤ كەسە بوو هەڤسەنگی د ناڤبەرا توندرەو و ميانرەوان دا رادگرت و هەروەسا دشيا فەرماندەیێ سوپایێ پاسداران رازی بكەت د دەمێ دانوستاندنێدا کاری بۆ رێكکەڤتنێ بكەن.

‏رۆژنامەیا تێلگراڤ دیار دکەت: یا ب ساناهی نینە كەسەکێ دی جهێ لاريجانی بگريت كا چاوا پێشتر كەسێ نەشيا جهێ قاسم سلێمانی بگريت. نەمانا لاريجانی وەکی وێ چەندێ بوو تو دەرگەهێ ئاشتییێ بگری و دەرگەهێ شەری ڤەکەیی. كوشتنا وی لێدانەكا مەزن بوو ل پرسا دانوستاندنان د ناڤبەرا ئەمريكا و ئيرانێدا. ب بۆچوونا من ب كوشتنا عەلی لاريجانی سيستەمێ ئێکگرتی یێ ئيرانێ دێ كەڤيته د مەترسییێدا و هندەك ئالی ڤێ چەندێ ب سەركەڤتن بۆ ئیسرائيلێ دبينن. بەلێ ئـــەز گەشبين نينم ب ئـــەگەرێ كوشتنا عەلی لاريجانی ژبەرکو پرسا دانوستاندنێ و ئاشتییێ ب زەحمەتر لێ هات و كوشتنا عەلی لاريجانی لێدانەكا سەربازی نەبوو بەلكو هێرشەکا راستەوخۆ بوو، ئـەو بنەمایێ سيستەمێ دەستهەلاتا ئيرانێ بوو. هەروەسا دشێت كاريگەریيا درێژخايەن ل سەر ئاسايشا دەڤەرێ و جيهانێ دروست بكەت. دوبارە ب بۆچوونا من كوشتنا عەلی لاريجانی شاشییەکا مەزن بوو کو شەر مەزنتر لێ بهێت و دەرگەهێ دانوستاندنان ب ئێکجاری بهێتەگرتن.

‏ژبەرکو بزاڤەک بۆ دانوستاندن و ئاشتییێ د ناڤبەرا ئـــەمريكا و ئيرانێدا هەبوو، لێ ئالییێ ئیسرائيلێ ئـــەڤ چەند پێ خوەش نەبوو، لەورا ئیسرائيل بزاڤێ دکەت بازنەیا شەڕی بەرفرەهـ بكەت. ئـــەمريكا ناخوازیت شەڕ زێدەتر مەزن ببیت و هەردەم دترسیت ژبەردەست دەربکەڤیت. ئیرانێ ئاخڤتنەك جوان هەیە، هەردەم دبێژیت: (هەوە دەست ب شەری کر، دویماهیكهینانا شەری دێ ب بریارا مەبیت).