گاڤ

نە بتنێ ئەمریکا مەرجان بۆ ئیرانێ دادنیت دا شەڕى راوەستینیت، ئیرانێ ژى هندەک مەرج بۆ ئەمریکا داناینە کو ب چ رەنگان د بەر عاقل نینن کو ئەمریکا قەبیل بکەت.

رۆژنامەیا وۆل سترین جۆرنال ژ ژێدەرێن هایدار وەرگرتییە کو نوونەرێن ئیرانێ دۆنالد ترەمپ، سەرۆکێ ئەمریکا ب مەرجێن خۆ ئاگەهدار کریە و دیارکریە، ئەو ب 7 مەرجان رازى نە ڤەگەڕنە دانوستاندنان، بەرپرسێن ئەمرکیى ژى وان مەرجان ب دویر ژ واقعى و ترانە پێکرن دبینن.

رۆژنامەیا وۆل سترین جۆرنال یا ئەمریکا ژ هندەک ژێدەرێن هایدار یێن نوینەرێن ئیرانێ ڤەگوهاستییە و دیارکریە، دۆنالد ترەمپ، سەرۆکێ ئەمریکا ب وان مەرجان ئاگەهدار کریە کو ڤەگەڕیتە دانوستاندنان.

مەرجێن ئیرانێ بۆ ئەمریکا چنە؟

• هەمى سەربازگەهێن ئەمریکا ل وەلاتێن کەنداڤى بهێنە دائێخستن.
• ئیران قەرەبوویا هەر جهەکى بۆمبەبارانکرى د شەڕى دا کرى بکەت.
• ئیران دێ گومڕکێ دانیتە سەر هەر کەشتییەکا د دەرتەنگا هۆرمز را دەرباز دبیت.
• ب گرەنتى جارەکا هێرش ل سەر ئیرانێ نەهێنە کرن.
• هێرشێن ئسرائیلێ ل سەر حزبوللا ل لبنان بهێنە راوەستاندن.
• هەمى سزایێن ل سەر ئیرانێ بهێنە راکرن.
• ئیران ل سەر بەرنامەیێ خۆ یێ رۆکێتان بەردەوام بیت.

ژ ئالییێ خۆ ڤە بەرپرسەکێ ئەمریکى بۆ هەمان رۆژنامە دیارکریە، ئەو داخوازیێن ئەمریکا نەواقعى نە و جهێ ترانە پێکرنێ نە، ئەڤ بانێ بلند بۆ داخوازییان ب ئەگەرەک بۆ ئالۆزکرنا دانوستاندنان دایە دیارکرن و ب بەردەومییا شەڕى ژى بناڤکریە.

ل گۆڕەیى مالپەڕێ ئەکسیۆس دو جاران ب رێ:ا وەلاتێن نیازا دانوستاندنێ هەیى ئەمریکا ئیران ب سەردا بریە و ئەو ناخوازن جارا سییێ ژى تووشى ب سەردابرنێ بن.

هەروەسا هەر ئێک ژ وەلاتێن پاکستان، مسر و تورکیا ئاگەهدارکرینە، کو زێدەکرنا لڤینێن سەربازى یێن ئەمریکا کو دۆنالد ترەمپ، سەرۆکێ ئەمریکا ل دەڤەرێ بەلاڤ دکەت گومان بۆ وان دروستکرینە کو دێ جارەکا دى راستى ب سەردابرنێ بن.