گاڤ

مەسروور بارزانی ب مەرەما ژ نێزیک هایداربوون ل سەر رەوشا وان یا ساخلەمییێ، سەرەدانا وان پێشمەرگەیان یێن ژ ئەنجامێ هێرشا مۆشەکی یا ئیرانێ ل سنۆرێ سۆران بریندار بووین کر و سۆز دا وان کو دێ هەمی جۆرێن چارەسەرییان بۆ وان هێنە دابینکرن.

پێنجشەمبییێ 26ێ ئادارا 2026ێ، مەسروور بارزانی سەرۆکوەزیرێ هەرێما کوردستانێ ل نەخۆشخانەکا هەولێرێ، سەرەدانا وان پێشمەرگێن بریندار کر یێن د هێرشا مۆشەکا بالستی یا ئیرانێ دا بۆ سەر هێزا پێشمەرگەیێ کوردستانێ ل دەڤەرا سۆران بریندار بووین.

ل گۆرەیی نڤیسینگەها سەرۆکوەزیری، د سەرەدانا خۆ دا مەسروور بارزانی گۆتە پێشمەرگەیان: "هەوە پشتراست دکەین کو هەر تشتێ بۆ چارەسەرکرنا هەوە پێدڤی بیت، چ ل ناڤخۆییا کوردستانێ بیت یان ل دەرڤەیی وەلاتی، دێ بۆ هەوە کەین."

سەرۆکوەزیرێ هەرێما کوردستانێ، پەیاما سۆز و پشتەڤانییا سەرۆک مەسعوود بارزانی گەهاندە پێشمەرگەیان و گۆت: "جەنابێ سەرۆک بارزانی ب بەردەوامی و د هەمی دەمان دا پرسیارا هەوە دکەت و هیڤیا زوی-باشبوونا هەوە دخوازیت، هەروەسان تەکەز کر، دڤێت هەر تشتێ بۆ باشتربوونا ساخلەیمیا هەوە و خزمەتکرنا هەوە پێدڤی بیت، بهێتە کرن."

هەروەسان سەرۆکوەزیری وەزارەتا ساخلەمییێ ژی راسپارد کو هەر تشتێ پێدڤی بیت بۆ چارەسەرکرنا پێشمەرگێن بریندار بکەن.

ئەڤ سەرەدانە د دەمەکی دایە، سپێدەهییا رۆژا سێشەمبییێ 24ێ ئادارا 2026ێ، د دو هێرشێن جودا-جودا دا، ب شەش مۆشەکێن بالستی یێن ئیرانێ، هێرش ل سەر بارەگایەکێ فرقەیا حەفت یا پیادە یا دەڤەرا ئێک و هێزەکا فرقەیا پێنج یا پیادە یا هێزا پێشمەرگەیی ل سنۆرێ سۆران هاتە کرن. ژ ئەنجامێ وان هێرشان شەش پێشمەرگە شەهید ببوون و 30 یێن دی ژی بریندار ببوون.