گاڤ

ئێکەم پێشنیار بۆ گرێبەستکرنێ گەهشتە محەمەد سەلاح، پشتی کو راگەهاندی ل دویماهییا ڤی وەرزی (2025-2026) دێ رێزێن یانەیا لیڤەرپول هێلیت.

سەلاح هەتا هاڤینا 2027ێ گرێبەست ل گەل لیڤەرپۆلێ هەیە، لێ هەردو ئالی گەهشتینە رێککەفتنەکێ کو ئەڤ یاریزانێ تەمەن 33 سالی، ل هاڤینا بهێت ب شێوەیەکێ بێ بەرامبەر کەلها "ئانفیلد" بهێلیت.

براد سیمز، رێڤەبەرێ جێبەجێکار یێ یانەیا نیویۆرک ستی یا ئەمریکی، داخوازا خۆ بۆ ڤەگوهاستنا سەلاحی دیار کر و تەکەز ل سەر وێ چەندێ کر کو حەز دکەت ستێرا مسری ب درێسێ یانەیا خۆ ببینیت. سیمز د کۆنفرانسەکێ وەرزشی دا گۆت: "گەلەک حەز دکەم گرێبەستێ ل گەل محەمەد سەلاحی ئیمزا بکەم، لێ هەتا نوکە مە چو دانوستاند ل گەل وی یان نوینەرێن وی نەکرینە. گرنگترین تشت ئەوە: ئەرێ یاریزان حەز دکەت بهێتە خۆلا ئەمریکی و ل باژێرێ نیویۆرک بیت؟"

هەروەسا گۆت ژی: "ئەم بزاڤێ ناکەین چو یاریزانەکێ قایل بکەین کو بهێتە نیویۆرک یان خۆلا مە. مە ئەو یاریزان دڤێن یێن کو ب راستی دڤێن ل ڤێرێ بن. سەبارەت ب یاریزانێن ستێرە ژی، پێدڤییە بڕیارێن دروست بدەین؛ یانەیا مە پێدڤی ب یاریزانەکی یە کو د راهێنانان دا ژ هەمیان پتر بزاڤان بکەت، هەڤالەکێ باش بیت بۆ یاریزانێن دی، و بهایەکی بۆ ژوورا جلکگوهارتنێ و کولتوورێ گشتی یێ یانەیێ زێدە بکەت."

یانەیا نیویۆرک ستی ژ سالا 2013ێ وەرە چەندین ستێرێن مەزن ڤەگوهاستینە، ژ وان ئەندریا پێرلۆیێ ئیتالی، داڤید ڤیایێ ئسپانی و فڕانک لامپاردێ ئینگلیزی. نیویۆرک ستی ب ڤێ گاڤێ دەرگەهـ بۆ چوونا چەندین ستێرێن دی بۆ خۆلا ئەمریکی (MLS) ڤەکر، وەک لیۆنێل مێسی، لویس سوارێز، هیۆنگ مین سۆن و ل دویماهییێ ژی ئەنتوان گریزمانێ فەڕەنسی کو بڕیارە ل هاڤینا بهێت پەیوەندییێ ب یانەیا ئۆرلاندا ستی بکەت.