گاڤ

ره‌وشا ساخله‌ميێ يا چيڤانۆكا ته‌پاپێى يێ به‌رازيلى پيلێ تێكدچيت و دێ جه‌ژنا سه‌رێ سالێ د نه‌خۆشخانه‌يێ ڤه‌ بۆرينيت.
رۆژنامه‌يا ماركا يا ئسپانى به‌لاڤكريه‌؛ پشتى پيلێ ل دويماهيكا هه‌يڤا چريا دوێ يا بۆرى چوويه‌ د نه‌خۆشخانه‌يێ ڤه‌، نوشدارێن نه‌خۆشخانه‌يا ئه‌لبێرت ئينشتاين ل ساوپاولۆ ل به‌رازيلێ رادگه‌هينن كو ره‌وشا پيلێ يێ 82 سالى تێكچوويه‌ و ئێدى به‌رسڤدانا چاره‌سه‌ريێ ل ده‌ف كێمبوويه‌ و چاڤدێريا ته‌مامكرنێ بۆ هه‌ناسه‌دانێ و كێمكرنا ئازاران بۆ دهێته‌ بكارئينان.
كيلى ناسيمێنتۆ كچا پيلێ ل سه‌ر ئينستاگرامێ خۆ وێنه‌يه‌كێ خۆ يێ نوى ل گه‌ل پيلێ ل نه‌خۆشخانه‌يێ به‌لاڤكريه‌ و ل سه‌ر نڤيسيه‌ "هێشتا ئه‌م ل ڤێرێ نه‌، مه‌ باوه‌رى مايه‌".
نه‌خۆشخانه‌يا ئه‌لبێريت ئينشتاين ژ به‌رى نوكه‌ راگه‌هاند بوو؛ پيلێ ژ وه‌رمينێن په‌نجه‌شێرێ دناليت هه‌روه‌سا پێدڤى ب چاره‌سه‌ريه‌كا به‌رفره‌هتر ژ بۆ ژكاركه‌فتنا گولچيسكان و تێكچوونا ره‌وشا دلى هه‌يه‌.
د سالێن بۆرى دا، ره‌وشا پيلێ به‌رده‌وام تێكدچوو و هه‌ر ژ ده‌مێ ل سالا بۆرى تووشى په‌نجه‌شێرا قولونێ بووى، به‌رده‌وام چاره‌سه‌ريا كيميايى بۆ دهێته‌ پێشكێشكرن زێده‌بارى نشته‌رگه‌ريه‌كێ بۆ راكرنا وه‌رمينێ ل هه‌يڤا ئيلۆنا 2021ێ.
دهێته‌ چاڤه‌رێكرن ياريكه‌رێ به‌رێ يێ هه‌لبژارتيێ به‌رازيل جه‌ژنێن كريسمسێ و سه‌رسالێ ئه‌ڤ ساله‌ د نه‌خۆشخانه‌يێ ڤه‌ ببۆرينيت.